दीपिका पादुकोण बलिउड चलचित्र उद्योगकी महँगी नायिकामध्येकी एक हुन् । तीनपटक फिल्मफेयर अवार्ड जितिसकेकी उनी प्रतिभाशाली अभिनेत्री मानिन्छिन् । दीपिकालाई अमेरिकाको टाइम म्यागेजिनले सन् २०१८ का सय प्रभावशाली व्यक्तिमा समावेश गरेर यसको पुष्टि गरिसकेको छ । यसले देखाउँछ, बौद्धिकता, सुन्दरता र अभिनयको क्षेत्रमा उनी विश्वभर छाएकी छिन् । ३३ वर्षीया दीपिका फिटनेस र सुन्दरताका हिसाबले सबैभन्दा धेरै पछ्याइने भारतीय हिरोइन पनि हुन् । अब जानौँ, उनको फिटनेस राज :
सन्तुलित भोजन
दीपिकाले खानपानमा निकै ध्यान दिने गरेकी छिन् । स्लिम रहन उनी फास्टफुड, जंक फुड र अस्वस्थ खानेकुराबाट सकेसम्म टाढा रहन्छिन् । उनको खानामा मौसमी फलफूल, सागसब्जी, फाइबर, प्रोटिन, खनिज र एन्टिअक्सिडेन्डयुक्त पदार्थ समावेश गरिएको हुन्छ । जसले तौल कम गर्न र स्वस्थ रहन मद्दत गर्ने उनको विश्वास छ ।
खानामा प्रायः उनी माछा, अन्डा, स्न्याक्स आदि लिन्छिन् । साथै, पलफूलको जुस, नरिवलको पानी, बटरमिल्कसँगै प्रशस्त पानी पनि पिउँछिन् । समय–समयमा खाना खाइरहने बानीले उनलाई स्वस्थ राख्न सहयोग पु-याएको छ । बिहानको खाजा र खानामा फलफूल अनिवार्य समावेश गर्छिन् । त्यस्तै, रातको समयमा हलुका खानेकुरा खाने गर्छिन, जसमा सकेसम्म मासुजन्य पदार्थ र भात
समावेश हुँदैन ।
जिम
पछिल्ला दुई वर्षदेखि दीपिका लगातार जिम गइरहेकी छिन् । गत वर्ष उनले अभिनेता रणवीर सिंहसँग विवाह गरिन् । बिहेको चटारोका कारण जिमका लागि समय नपुगेकाले पछि उनले धेरै समय फिटनेस वर्कआउटमा खर्चनुपरेको थियो । सोहीकारण, हाल उनी नियमित कार्डियो एक्सरसाइज र वेट लिफ्टििङ ट्रेनिङ गरीरहेकी छिन् । यसले उनलाई स्लिम र फिट रहन मद्दत पु-याइरहेको छ ।
नृत्य
आफूलाई फिट राख्न दीपिका सधैँ नृत्य गर्ने गर्छिन् । ज्याज, भरतनाट्यम्, कथ्थक आदि नृत्य उनको रोजाइमा पर्ने गर्छ । उनले नृत्य तालिम पनि लिने गरेकी छिन् । नृत्य गर्दा शरीरमा रहेको अतिरिक्त क्यालोरी खपत हुने उनको मान्यता छ ।
योग
दीपिका हरेक बिहान योग गर्छिन् । यसले उनलाई दिनभर सक्रिय र तनावमुक्त रहन मद्दत गर्छ । उनी योगमा सूर्य नमस्कार, मार्जरी आसन, वीरभद्रासन, सर्वांगासन, प्राणायाम गर्छिन् । यस्ता योगले शरीरमा रहेका विषाक्त वस्तु बाहिर निस्कने उनको विश्वास छ ।
पाइलेट्स एक्सरसाइज
दीपिका पाइलेट्स फिटनेस तालिम गर्न मन पराउँछिन् । उनको बुझाइमा पाइलेट्स शरीरलाई लचिलो बनाउने अद्भूत तरीका हो । जसले फिगरलाई आर्कषक बनाउँछ । उनी पाइलेट्समा जम्पिङ सिरिज गर्ने गर्छिन् । जुन कार्डियो र पाइलेट्सको मिश्रण हो । यो तौल घटाउन र फिटनेस कायम गर्न प्रभावकारी हुन्छ । नयाँ पत्रिका
प्रतिक्रिया दिनुहोस