निर्देशक सञ्जयलीला भंसालीले आधुनिक प्रेमकथानक फिल्म निर्माण गर्न लागेका छन् । उनको सो फिल्ममा सलमान खानको मुख्य भूमिका रहने चर्चा छ । तर, आधिकारिक घोषणा भने भइसकेको छैन ।
सलमानले सञ्जयका खामोसी, हम दिल दे चुके सनम र साबरिया फिल्ममा अभिनय गरेका थिए । ती सबै फिल्म हिट भएका थिए । पछिल्लो समय सञ्जयले लगातार तीनवटा फिल्म–गोलियोका रासलीला रामलीला, बाजिराव मस्तानी र पद्मावतमा रणवीर सिंहलाई मुख्य भूमिकामा लिए । अब भने उनले सलमानलाई फेरि एकपटक हिरो लिँदै छन् ।
खबरअनुसार सञ्जयको सो फिल्मको नाम इन्साअल्ला रहनेछ । सलमानकी हिरोइन को हुनेछिन् भन्नेचाहिँ पक्का भइसकेको छैन । सञ्जय निकट स्रोतका अनुसार विगतका फिल्ममा झैँ यसमा पनि दीपिका पादुकोण नै हिरोइन हुने अधिक सम्भावना छ । तर, हिरोइन को राख्ने भन्नेबारे सधैँ सलमानले नै निर्णय गर्ने गरेका छन् ।
त्यसैले, सञ्जयले सलमानसँग सल्लाह गर्ने बताइएको छ । दीपिकाले भने आफूले सलमानसँग अभिनय गर्न चाहेको बताउँदै आएकी छिन् । यसपालि निर्देशक सञ्जयले आफ्नी फेभरेट हिरोइनको इच्छा पूरा गर्ने सम्भावना देखिन्छ । नयाँ पत्रिका
प्रतिक्रिया दिनुहोस