शिक्षकका जायज माग सम्बोधनमा ढिला हुनु हुँदैन : एनपी साउद

काठमाडौँ । नेपाली कांग्रेसका नेता एनपी साउदले  शिक्षकका जायज माग तत्काल सम्बोधन गर्न सरकारसँग आग्रह गरेका छन् ।  सङ्घीय राजधानीमा जारी शिक्षकहरूको आन्दोलनलाई समर्थन गर्दै उनले सामाजिक सञ्जाल फेसबुकमार्फत सरकारसँग शिक्षकहरूका जायज माग पूरा गर्न आग्रह गरेका हुन् ।

‘शिक्षा देशको समृद्धिको आधार हो, शिक्षाको सुधार विना मुलुकको प्रगति सम्भव छैन,’ साउदले लेखेका छन्, ‘सन्तुष्ट शिक्षकबाट मात्र गुणस्तरीय शिक्षाको सुनिश्चितता सम्भव छ। त्यसैले शिक्षक तथा कर्मचारीका समस्या समाधान गर्दै देशलाई समृद्धिको दिशातर्फ लैजान ढिला गर्नु हुन्न।

साउदले सामुदायिक शिक्षाको सुधार र शिक्षक–कर्मचारीका न्यायोचित मागबारे आफू सधैँ शिक्षकहरूसँग रहने प्रतिबद्धता पनि व्यक्त गरेका छन्। शिक्षकहरू विद्यालय शिक्षा विधेयकका केही बुँदाहरूप्रति असन्तुष्टि जनाउँदै आन्दोलनरत छन्। उनीहरूले विधेयकमा सुधार नगरे सरकारसँग ठोस सङ्घर्षमा जाने चेतावनी दिएका छन्।

सङ्घीय संसद्को विषयगत समितिमा विद्यालय शिक्षा विधेयकमाथि छलफल चलिरहेका बेला विधेयकका केही प्रावधानप्रति असन्तुष्टि जनाउँदै आन्दोलनमा उत्रिएका शिक्षकहरूका मागप्रति शिक्षा क्षेत्रमा क्रियाशील व्यक्तिहरूले गम्भीर ध्यान दिनुपर्ने आवश्यकता औँल्याइरहेका छन् ।