सवारी दुर्घटनामा तीन जनाको मृत्यु

काठमाडौँ। काठमाडौं, नुवाकोट र चितवनमा भएका सवारी दुर्घटनामा तीन जनाको मृत्यु भएको छ । काठमाडौं महानगरपालिका-११ बबरमहल चोक नजिक बा.८६ प ९०४० नम्बरको मोटरसाइकल अनियन्त्रित भई बुधबार राति दुर्घटना हुँदा एक जनाको मृत्यु भयो ।

मृत्यु हुनेमा मोटरसाइकल चालक भक्तपुर थिमी नगरपालिका बस्ने खोटाङ घर भएका २६ वर्षीय इसान राई रहेका छन् । दुर्घटनामा गम्भीर घाइते भएका उनको अन्नपूर्ण न्यूरो अस्पताल माइतीघरमा उपचारको क्रममा मृत्यु भएको हो । 

यस्तै, नुवाकोटको तारकेश्वर गाउँपालिका-१ छापडाँडामा बा २ ख ६८०४ नम्बर बसको ठक्करबाट सोही ठाउँ बस्ने अन्दाजी ३७ वर्षीया मन्जु तामाङको बुधबार राति मृत्यु भएको हो । 

दुर्घटनामा गम्भीर घाइते भएकी उनको जिल्ला अस्पताल त्रिशुलीमा उपचारका क्रममा मृत्यु भएको प्रहरीले जनाएको छ । बस चालकलाई प्रहरीले नियन्त्रणमा लिएको छ । 

उता, चितवनको भरतपुर महानगरपालिका-१ भतेरी जङ्गलस्थित सडकमा बा २५ प ४४०३ नम्बरको मोटरसाइकल ना ६ ख ४७५१ नम्बरको ट्रकमा ठक्कर खाई बिहीबार बिहान दुर्घटना हुँदा मोटरसाइकल चालकको मृत्यु भएको छ । 

मृतक अन्दाजी ३० वर्षीय पुरुषको हाल नाम, थर, वतन खुलेको छैन । दुर्घटनामा गम्भीर घाइते भएका उनको नयाँ मेडिकल कलेज भरतपुरमा उपचारको क्रममा मृत्यु भएको चितवन प्रहरीले जनाएको छ । 

उक्त मोटरसाइकल र बा प्र०३०३ प ५२५७ नम्बरको स्कुटर एकआपसमा ठक्कर खाँदा मोटरसाइकल अनियन्त्रित भई ट्रकमा समेत ठक्कर खाई दुर्घटना भएको थियो । स्कुटर चालक र ट्रक चालकलाई प्रहरीले नियन्त्रणमा लिएको छ ।