रविलाई अदालत पुर्‍याइयो, कास्कीमा म्याद नथपिए रुपन्देही लगिने

काठमाडौं। सहकारी ठगी प्रकरणमा अनुसन्धानका लागि पक्राउ परेका रास्वपा सभापति रवि लामिछानेलाई म्याद थपका लागि मंगलबार अदालतमा उपस्थित गराइएको छ । प्रहरीले लामिछानेलाई मंगलवार कास्की जिल्ला अदालतमा उपस्थित गराएको हो ।

पोखराको सूर्यदर्शन सहकारीको रकम गोरखा मिडियामा लगेर अपचलन गरेको आरोपमा उनलाई प्रहरीले कात्तिक २ गते काठमाडौंबाट पक्राउ गरेको थियो । यसअघि शुरूमा ५ र दोस्रोपटक ७ दिन म्याद थपिएको थियो । दोस्रोपटक थपिएको म्याद कात्तिक १५ गते सकिएको थियो ।

तिहार बिदाका कारण अदालत बन्द भएपछि तेस्रोपटक म्याद थपका लागि प्रहरीले मंगलबार मात्र लामिछानेलाई अदालतमा उपस्थित गराएको हो । लामिछानेलाई अदालत उपस्थित गराइँदा रास्वपा कार्यकर्ताले प्रदर्शन गरेका थिए ।

गोरखा मिडिया नेटवर्कका तत्कालीन प्रबन्ध निर्देशक रहेका लामिछाने र अर्का सञ्चालक छविलाल जोशीसहितमाथि प्रहरीले संगठित अपराधमा अनुसन्धान गरिरहेको छ । कास्की जिल्ला अदालतले म्याद नथपेमा लामिछानेलाई रुपन्देही लैजाने तयारी छ ।

बुटवलको सुप्रिम सहकारीको रकम दुरुपयोग सम्बन्धमा पक्राउ गरेर अनुसन्धान गर्न रुपन्देही जिल्ला अदालतले अनुमति दिइसकेको छ ।कास्की जिल्ला अदालतले म्याद नथपेमा आजै रुपन्देही लैजाने तयारी भएको प्रहरीका एक उच्च अधिकारीले  जानकारी दिए । पक्राउ पुर्जीबारे जिल्ला प्रहरी कार्यालय रुपन्देहीले कास्कीसँग समन्वय गरिरहेको छ ।