प्रधानमन्त्रीज्यू गल्ती सच्याउँछु भन्दा पनि नपाउने परिस्थिति आउन सक्छ : राजेन्द्र लिङ्देन

काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले राजा र धर्मलाई गाली गरेर वाहवाही कमाउने समय सकिसकेको बताएका छन् । प्रतिनिधि सभाको बैठकमा बोल्दै आफूहरू सानो संख्या भए पनि गणतन्त्रको नाममा लुटतन्त्र मच्चाइरहेको बताए ।

उनले यो व्यवस्थाको सदन र सडकबाट विरोध गर्दै बहुमत पुगेको बेलामा पल्टाउने दाबी गरे । अहिले आफूहरू सत्ताको खेलमा नरहेको प्रष्टीकरण दिए । उनले प्रधानमन्त्री प्रचण्डलाई भने, अघिल्लो पटक गठबन्धन फेर्दा मैले प्रधानमन्त्रीलाई तपाईँको जीवनको अन्तिम गल्ती पनि हुनसक्छ भनेको थिएँ। अहिले यहाँसम्म आएर नयाँ चाल चाल्नुभएको छ। म फेरि पनि भन्छु प्रधानमन्त्रीको जीवनको अन्तिम गल्ती यो नहोस्। मानिसहरूको जीवनमा गल्ती हुन्छन्। गल्ती सच्याउने मौका पनि हुन्छ। तर, कहिलेकाहीँ यस्तो समय आउँछ गल्ती सच्याउँछु भन्दा मौका आउँदैन। त्यस्तो नहोस्।