सामाजिक संघ, संस्थाहरूले निःस्वार्थ सेवाभावका साथ काम गर्नु पर्दछ : सभामुख घिमिरे

काठमाडौँ । प्रतिनिधिसभाका सभामुख देवराज घिमिरेले निःस्वार्थ सेवाभावका साथ काम गर्न सामाजिक संघ, संस्थाहरूलाई आग्रह गरेका छन् । सभामुख घिमिरेले नेपाल जाति, भाषा, कला, संस्कृति आदि सबै हिसाबले समुन्नत रहेकाले त्यसको प्रचार गर्ने काममा पनि सामाजिक संघ, संस्थाहरूको भूमिका महत्त्वपूर्ण हुने विश्वास समेत व्यक्त गरेका हुन् । 

फोकस नेपालले शनिबार काठमाडौँमा आयोजना गरेको एक कार्यक्रममा बोल्दै उनले भौतिक रूपमा नेपाल गरिबीको चपेटामा रहेको भए पनि भाषा, कला र संस्कृतिको हिसाबले समुन्नत रहेको पनि स्मरण गराए । घिमिरेले भने, ‘समाज सेवा भन्दा खेरी समाज एउटा शब्द भो, सेवा अर्को शब्द भो । तर वास्तवमा समाजको सेवा गर्ने कुरा समय, काल, परिस्थिति, विषय हरेक हिसाबले यसका परिभाषा त हुन्छन् । तर मेरो बुझाइमा यो ज्यादै महान् कुरा हो । महत्त्वपूर्ण कुरा हो । र, यसमा योगदान गर्ने कुराहरू निःस्वार्थ ढंगले नै गरिएको हुन्छ । र, त्यसमा कुनै पनि स्वार्थहरू राखेर आफ्ना नाम कमाउँछ, एउटा क्षेत्रमा केही योगदानहरू गर्छु भन्ने खालका अलि ठुलै त्यसका स्वार्थहरू होलान् । त्यो भन्दा पनि समाजलाई सोचेको ठाउँमा कसरी लैजान सकिन्छ ? यसको बारेमा सोच्ने र त्यसमा विभिन्न क्षेत्रको भूमिकाहरू के हुन सक्छ ? क–कसले कस्तो–कस्तो भूमिका निर्वाह गरेर मात्रै समुन्नत बनाउन सकिन्छ ? यसको बारेमा बहस, छलफल गर्नु आफैँमा महत्त्वपूर्ण कुरा हो भने त्यसले निकालेका निष्कर्षहरुलाई कार्यान्वयन गर्ने कुरा अझै ठूलो हो । मलाई के लाग्छ भने नेपाल हामी भौतिक रूपबाट अभाव, गरिबी, कतिपय मानेमा पछौटेपन, दरिद्रता वा समस्या भित्र हामी गुज्रिरहेका छौँ । तर हामी त्यस्तो हुनुपर्ने मुलुक होइनौँ । जातिको हिसाबले हेर्‍यौँ भने पनि हामी समुन्नत जाति भित्र पर्छौँ । हाम्रा पुर्खाहरूको इतिहासलाई हेर्‍यौँ भने पनि उनीहरूले गरेका योगदान वास्तवमा सिंगो मानव जातिलाई आधुनिक भन्दा आधुनिक ठाउँमा लैजाने विचार त्यतिबेलै उत्पत्ति भएका थिए ।’