ट्वीटरको सीईओबाट किन राजीनामा दिँदैछन् एलन मस्क ?

एजेन्सी । विश्वकै धनी एलोन मस्कले ट्वीटरको सीईओ पद छाड्ने आँकलन हुन थालेको छ । उनले प्रयोगकर्ताहरूलाई सीईओको पद छोड्ने वा नछड्ने भन्नेबारे निर्णय गर्न आग्रह गर्दै एक सर्वेक्षण ट्वीट गरेका छन् । उनले नतिजा पालना गर्ने वाचासमेत गरेका छन् । 

मस्कले सीईओको रूपमा केही महिनायता कम्पनीमा केही उथलपुथल गरेका छन्। ट्विटरका हजारौं कर्मचारीहरूलाई हटाउने र ठूला नीति परिवर्तनहरू गरेका छन् । त्यस्तै ब्लु टिक प्रमाणिकरणका लागि शुल्क लिनेदेखि अमेरिकी पूर्वराष्ट्रपति डोनाल्ड ट्रम्पलगायत धेरै विवादास्पद व्यक्तित्व र संगठनहरूमाथि लागेको प्रतिबन्ध हटाउने निर्णय गरेका छन् ।

यसअघि नै उनले ट्विटरको सीईओको रूपमा लामो समयसम्म काम गर्न नचाहेको बताएका थिए ।