एक्समा एलन मस्कले फेरे आफ्नो नाम

वासिङ्टन डिसी । अमेरिकी खर्बपति व्यापारी तथा नवनिर्वाचित राष्ट्रपति डोनल्ड ट्रम्पको बाहिरी सल्लाहकार एलन मस्कले आफ्नो नाम फेरेका छन् । माइक्रो ब्लगिङ वेबसाइट एक्समा मस्कले आफ्नो नाम फेरेर केकिउस म्याक्सिमस राखेका छन् ।

एक्सको प्रोफाइलमा नयाँ फोटो र नाम राखेको बारे उनले कुनै पनि स्पष्टीकरण दिएका छैनन् । प्रोफाइलमा उनले कमिक पात्र पेपे द फ्रगको तस्बिर राखेका छन् । यो तस्बिरलाई अति दक्षिणपन्थी समूहले मेमेको रूपमा प्रयोग गर्दै आएका छन् ।

मस्कको यो कदमले क्रिप्टोसंसारमा हलचल उत्पन्न गराएको छ । मेमेक्वाइनको भाउ आकाशिएको छ । विगतमा पनि मस्कको हरेक कदमले क्रिप्टोकरेन्सीको भाउ प्रभावित बनाएका थिए ।