४ हप्तामा वाणिज्य बैंकहरुको निक्षेप १ खर्ब २० अर्बले घट्यो

काठमाडौं । साउन यता लागेयता वाणिज्य बैंकहरुको निक्षेप १ खर्ब रुपैयाँको ओरालो लागेको छ । गत असार महिनाको ३२ गतेदेखि चालू आर्थिक वर्षको पहिलो महिना अर्थात साउन २७ गतेसम्मको अवधिमा वाणिज्य बैंकहरुको निक्षेप एक खर्ब २० अर्ब रुपैयाँले घटेको हो ।

नेपाल बैंकस एसोसिएसन (एनबीए) तथ्याङ अनुसार गत असार ३२ गतेसम्म वाणिज्य बैंकहरुमा ४५ खर्ब ४१ अर्ब रुपैयाँ निक्षेप रहेको थियो । उक्त निक्षेप साउन २७ गतेसम्म आइपुग्दा ४४ खर्ब २१ अर्ब रुपैयाँमा सिमित बनेको छ ।

साउनको दोश्रो सातामा ४१ खर्ब ६४ अर्ब रुपैयाँ बराबरको कर्जा लगानी गरेका बैंकहरुले साउनको चौथो सातासम्ममा ४१ खर्ब ७५ अर्ब रुपैयाँ बराबरको लगानी गरेका छन् । त्यस्तै, एक सातामा यस्तो लगानी ९ अर्ब रुपैयाँले बढेको छ ।

निक्षेप बाहिरिने क्रम बढेसँगै वाणिज्य बैंकहरुको औसत सीडी रेसियो पनि बढ्न थालेको छ। गत साउन २० गतेसम्म सीडी रेसियो ८७.६९ प्रतिशत रहेकोमा साउन २७ गतेसम्म बढेर ८८.३५ प्रतिशत पुगेको छ।