जसपा राजेन्द्र श्रेष्ठको नेतृत्वमा सरकारमा जाने, को को छन् मन्त्रीको सूचीमा ?

काठमाडौं । जनता समाजवादी पार्टी (जसपा) नेता राजेन्द्र श्रेष्ठको नेतृत्वमा सरकारमा जाने भएको छ । जसपा अध्यक्ष उपेन्द्र यादवको नेतृत्वमा सरकारमा सहभागी हुने बताइएपनि अन्तिममा जसपाले श्रेष्ठको नेतृत्वमा सरकारमा जानेभएको हो ।

यादवले उपप्रधानमन्त्री पाए मात्रै सरकारमा जाने अडान लिएका थिए । तर, प्रधानमन्त्री देउवाले आफ्नो क्याबिनेटमा कसैलाई पनि उपप्रधानमन्त्री नबनाउने जवाफ दिएपछि यादव पछि हटेका हुन् ।

जसपामा मन्त्री बन्न धेरैले आकांक्षा देखाएका छन् । २० सांसद रहेको जसपामा सबैले मन्त्री दाबी गरेपछि यादव र भट्टराई संकटमा परेका थिए । तर, आन्तरिक छलफलबाट राजेन्द्र श्रेष्ठ, महेन्द्र राय यादव, प्रदीप यादव, रेणु यादव, प्रमोद साह, मृगेन्द्र सिंह मन्त्री बन्ने टुंगो लागेको एक नेताले जानकारी दिए । जसपाले पाँच मन्त्री र राज्यमन्त्री थप भए एकजना पाउने सहमति जुटेको छ ।

एकीकृत समाजवादीले पनि पाँच मन्त्री र एक राज्यमन्त्री पाउने भएको छ । एकीकृत समाजवादीबाट विरोध खतिवडा, रामकुमारी झाँक्री, प्रेम आले, मेटमणि चौधरी, किसान श्रेष्ठलगायत मन्त्री बन्ने टुंगो लागे पनि सरकारमा पार्टीको नेतृत्व कसले गर्ने भन्ने अझै टुंगिन सकेको छैन ।

माओवादी केन्द्रबाट भने देवेन्द्र पौडेल, हरिबोल गजुरेल, सुदन किराँती, अञ्जना विशंखे, जयपुरी घर्ती मन्त्री बन्ने चर्चा छ । यसअघि नै माओवादीबाट जनार्दन शर्मा र पम्फा भुसाल मन्त्री बनिसकेका छन् ।

कांग्रेसबाट भने दिलेन्द्रप्रसाद बडू, डा. मिनेन्द्र रिजाल, उमाकान्त चौधरी र पुष्पा भुसाल सरकारमा सहभागी हुने आन्तरिक सहमति भएको छ । सरकारमा सहभागी हुने मन्त्रीको टुंगो लागे पनि अझै मन्त्रालयको भागबन्डा टुंगिन सकेको छैन ।

नेकपा माओवादी केन्द्रका अध्यक्ष पुष्पकमल दाहाल प्रचण्डले मन्त्रालयको भागबन्डा भएपछि मन्त्रिमण्डल विस्तार हुने बताइसकेका छन् । बिहीबार सहिद प्रतिष्ठान नेपालको १२औं वार्षिक उत्सवलाई सम्बोधन गर्दै अध्यक्ष प्रचण्डले मन्त्रालयको भागबन्डा टुंगो लागेपछि मन्त्रिमण्डल विस्तार हुने बताएका हुन् ।

‘अर्थ र उर्जामन्त्रालय लिइसकेका छौं । अरु मन्त्रालय आजभोलि नै टुंगिदैछ,’ उनले भने । सम्भवतः आज÷भोलि नै मन्त्रिपरिषद बिस्तार टुंगिन्छ होला ।’