लोसपा नेपालका उपाध्यक्ष झा जसपामा प्रवेश

काठमाडौँ । लोकतान्त्रिक समाजवादी पार्टी नेपालका उपाध्यक्ष पुरुषोत्तमलाल झा अशोक राई नेतृत्वको जनता समाजवादी पार्टीमा प्रवेश गरेका छन् । जसपाले आज पर्सामा आयोजना गरेको पार्टी प्रवेश कार्यक्रममार्फत उपाध्यक्ष झाले प्रवेश गरेका छन् । उनलाई जसपाका अध्यक्ष अशोक राईले फुलमाला लगाएर पार्टीमा प्रवेश गराएका हुन् ।

झा केन्द्रका उपाध्यक्ष हुनुको साथै पर्सा जिल्लाका अध्यक्षको जिम्मेवारीमा थिए । पाँचपटक वडा अध्यक्ष र एकपटक उपमेयर समेत भइसकेका झा लामो समयदेखि मधेश राजनीतिमा लागेका छन् । उनले लोसपा नेपाल गतिशील पार्टी नभएका कारण छाडेर जसपामा प्रवेश गरेको बताए ।

उनले लोसपा नेपालका कुनै नेतामाथि कुनै व्यक्तिगत टिका टिप्पणी नगर्ने तर पार्टी नै चलायमान नभएका कारण एक नयाँ गतिशील पार्टीमा प्रवेश गरेको बताए । लोसपाबाट झासहित अन्य केही केन्द्रीय सदस्य तथा जिल्ला तहका नेताहरु पनि जसपामा प्रवेश गरेका छन् ।

लोसपा नेपालले वैशाख २६ गतेका लागि महाधिवेशनको मिति तय गरेको छ । त्यस्तै पार्टी प्रवेश कार्यक्रममा कांग्रेस र जसपा नेपालबाट पनि केही नेता तथा कार्यकर्ता प्रवेश गरेको जसपाका उपमहासचिव एवं खानेपानी मन्त्री प्रदीप यादवले बताए ।