जेनेभामा आज अमेरिकी राष्ट्रपति जो बाइडेन र रुसी राष्ट्रपति भ्लादिमिर पुटिनबीच भेट हुँदै

काठमाडौँ । स्वचरल्यान्डको जेनेभामा आज अमेरिकी राष्ट्रपति जो बाइडेन र रुसी राष्ट्रपति भ्लादिमिर पुटिनबीच भेट हुँदैछ । दुई नेताबीचको उच्चस्तरीय सम्मेलनका लागि बाइडेट हिजै जेनेभा पुगेका थिए । केही समयअघि मात्रै पुटिन चढेको विमान पनि जेनेभामा उत्रदैंछ । 

रुसी सञ्चारमाध्यम रसिया टुडेका अनुसार अबको एक घण्टाभित्रै दुई नेता संवादमा जुट्नेछन् । र, दुई नेताबीच चार वा पाँच घण्टासम्म छलफल हुनेछ । बाइडेन राष्ट्रपति चुनिएयता दुई शक्तिशाली नेताबीच हुन लागेको यो पहिलो भेट हो । रुस र अमेरिकाबीच धेरै विषयमा विवाद छ । अमेरिकाले रुसमाथि साइबर आक्रमणको आरोप लगाउँदै आएको छ । त्यस्तै, रुसले युक्रेनमा गरेको हस्तक्षेपको पनि उसले विरोध गर्दै आएको छ ।

पछिल्लोपटक रुसले बन्दी बनाएका विपक्षी नेता एलेक्साई क्रेमलिनको विषयमा पनि पश्चिमा देशहरुले चासो व्यक्त गर्दै आएका छन् । त्यस्तै मध्यपूर्वमा दुई देशको स्वार्थ बाझिएको छ । यसका बाबजुद जलवायु परिवर्तन, महामारीको नियन्त्रणलगायत धेरै विषयमा दुई देशबीच सहकार्य जरुरी पनि छ । यी दुई नेताबीचको संवादका लागि कुनै एजेन्डा भने तय भइसकेको छैन । जसकारण, उनीहरुले स्वतन्त्र रुपमा संवाद अघि बढाउनेछन् । 

भेटअघि बाइडेनले आफ्ना समकक्षी पुटिनलाई ‘मुल्यवान् प्रतिद्वन्द्वी’ भनेर टिप्पणी गरेका छन् । यता, पुटिनले केही वर्षयता रुस–अमेरिका सम्बन्ध अति नै न्युन बिन्दुमा रहेको जनाएका थिए । यस सम्मेलनपछि दुबै नेताले छुट्टाछुट्टै पत्रकार सम्मेलन गर्ने कार्यक्रम छ । 

‘ब्रेक थ्रुको अपेक्षा नगरौं’ 
बुधबार बिहान रुसी राष्ट्रपतिको कार्यालय क्रेमलिनका प्रवक्ता देमिट्री पेस्कोभले सम्मेलनबाट विवादीत विषयमा ‘ब्रेक थ्रु’ हुने अपेक्षा नगर्न आग्रह गरेका हुन् । उनले रुसको सरकारी टेलिभिजनलाई अन्तर्वाता दिदैं यस्तो बताए । आजको संवाद निकै कठिन हुने पनि उनले बताएका छन् । ‘ब्रेक थ्रुको अपेक्षा गर्न सकिने संभावना छैन । रुस–अमेरिका सम्बन्ध निकै गाह्रो अवस्थामा छ,’ उनले भने,‘तर दुई राष्ट्रपतिले समस्याका विषयमा खुलेरै छलफल गर्ने निर्णय गरेका छन् । यो आफैंमा उपलब्धि हो ।’