माघ १७ गते प्रधानमन्त्री ओली सहभागी हुने कार्यक्रममा सहभागी नहुन नेकपा चितवनको अपिल

चितवन । नेकपा (प्रचण्ड माधव समूह) चितवनले यही माघ १७ गते चितवन जिल्लामा आफ्नो कुनै कार्यक्रम नभएको जनाएको छ । 

नेकपा चितवनले आज पत्रकार सम्मेलन गरी माघ १७ गते कुनै कार्यक्रम नभएको कुनै कार्यक्रम भए त्यसमा सहभागी नहुन अपिल गरेको छ । नेकपा चितवनका अध्यक्ष यमबहादुर परियार इन्द्रजितले माघ १७ गते नेकपा चितवनको कुनै कार्यक्रम नभएको हुनाले त्यो दिन हुने कुनै गुट वा समूहको नाममा गरिने कार्यक्रममा पार्टीको कुनै संलग्नता नहुने बताए । उनले कुनै गुटले गरेको कार्यक्रममा सहभागी नहुन पनि सचेत गराएका थिए । 

कार्यक्रममा नेकपा चितवनका इन्चार्ज कृष्ण खनालले संसद पुनस्र्थापना नै हुने जिकिर गरे । उनले निर्वाचन घोषणापछि आचारसंहिता विपरीत कार्यक्रम तथा सभाहरु आयोजना भएकै कारण निर्वाचन आयोगलाई पत्र पठाएर त्यस्ता कार्यक्रम रोक्नलाई अनुरोध गरिएको बताए । उनले केपी ओलीबाट प्रतिगमन भएको र प्रतिगमन नसच्चिएसम्म चुनाव हुन नसक्ने बताए । उनले पुल्चोक गोन्द्राङ ६ लेनको सडक र सिटी हल निर्माणको काम अघि बढिसकेको हुनाले अब शिलान्यास हुनुलाई हास्यापद भएको बताए । 

‘सत्ताको पद र शक्तिको दुरुपयोग गरी गरिने यस्तो शिलान्यास कार्यक्रम निर्वाचन आचारसंहिताको ठाडो उल्लंघन हो’ नेकपा चितवनका अध्यक्ष यमबहादुर परियार र सचिव कृष्णभक्त पोख्रेलले जारी गरेको विज्ञप्तिमा भनिएको छ, ‘नेकपा चितवन यस्ता गुटगत राजनीतिको भ्रममा नपर्न सम्पूर्ण श्रमजीवी वर्ग र सर्वहारा सुकुमबासी जनसमुदायमा हार्दिक अपिल गर्दछौँ ।’

भरतपुर महानगरको गौरवको आयोजनामाथि संघीय सरकारको ठाडो हस्तक्षेप : प्रमुख रेनु दाहाल
चितवन । भरतपुर महानगरपालिका प्रमुख रेनु दाहालले यहाँको गौरवको आयोजना सिटी हल र पुल्चोक–गोन्द्राङ ६ लेन सडकको शिलान्यास काम चलाउ सरकारका प्रधानमन्त्री केपी शर्मा ओलीले गर्न नमिल्ने बताएकी छन् । 

आज भरतपुर महानगरपालिकाकै सभाहलमा आयोजित पत्रकार सम्मेलनमा प्रमुख दाहालले महानगरसँग कुनै समन्वय नै नगरी, कुनै जानकारी नगराई स्थानीय तहको गौरवको आयोजनामा केन्द्र सरकारले हस्तक्षेप गर्नु राज्यको दुरुपयोग भएको बताइन् । पत्रकार सम्मेलनमा प्रमुख दाहालले भनिन्, ‘काम सुरु भइसकेको आयोजनाको शिलान्यास गर्न प्रधानमन्त्री नै आउनु भनेको राज्यको सरासर दुरुपयोग हो, यसमा हाम्रो गम्भीर असहमति छ, स्थानीय स्वायत्त शासनको बर्खिलाप भएको महसुस हामीले गरेका छौँ ।’

केन्द्र सरकारको ठाडो हस्तक्षेप
प्रमुख दाहालले काम चलाउ सरकारले भरतपुर महानगरलाई निषेध गरेर संघीयताको मूल मर्म विपरीत गएर स्थानीय सरकारको अधिकारमाथि ठाडो हस्तक्षेप गरेको बताइन् । उनले भनिन्, ‘विगतमा पटकपटक शिलान्यासको मिति तोकेर तयारी ग¥यौँ, तर अनेक बहाना बनाइ शिलान्यास गर्न दिइएन, अहिले काम सुरु भइसकेको आयोजनामा स्थानीय सरकारलाई गुमराहमा राखेर शिलान्यास गर्ने योजना केन्द्र सरकारले बनाएकोमा यसप्रति हाम्रो गम्भीर असहमति छ ।’

प्रमुख दाहालले महानगरलाई पूरै माइन गरेर शिलान्यास कार्यक्रम राखेकाले सो कार्यक्रममा महानगर सहभागी नहुने बताइन् । उनले प्रश्न गर्दै भनिन्, ‘शिलान्यास कार्यक्रमपछि आमसभा समेत राखिएको सुनिएको छ, शिलान्यास कार्यक्रम भन्ने अनि राज्यको दुरुपयोग गरेर आमसभा राख्न मिल्छ ?’ भरतपुर महानगरले यसअघि पटकपटक अर्थमन्त्री विष्णु पौडेलसँग कुराकानी गरेर शिलान्यास गर्न खोज्दा विभिन्न बहानाबाजी गरेर रोक्ने काम भएको प्रमुख दाहालले बताइन् ।

संघीय सरकारकोे हतोत्साहित बनाउने हर्कत 
‘संघीयताको मर्म भनेको स्थानीय सरकारको अधिकार खोस्ने हो ? स्वामित्व लिने हो ?’ उनले प्रश्न गर्दै भनिन्, ‘संघीय सरकारको यस्तो हर्कतबाट स्थानीय सरकार निराश भएको छ, हतोत्साही भएको छ ।’ सिटी हल र ६ लेन सडकको परिकल्पनाकार भरतपुर महानगर भएको उनको भनाइ छ ।

पत्रकार सम्मेलनमा प्रमुख दाहालले सिटी हल र ६ लेन सडकको काम तीव्र रुपमा अगाडि भरतपुर महानगरले बढाएको बताइन् । उनले भनिन्, ‘संघीय सरकारले बाइपास गरे पनि निर्माणको काम रोकिने छैन, समयअगावै काम सम्पन्न गर्नेछौँ । गुणस्तरीय बनाउनेछौँ ।’ उनले निर्माणको क्रममा आउने सबै समस्या समाधान गर्न भरतपुर महानगरले एउटा संयन्त्र बनाएको बताइन् । 

आमालाई बच्चाको माया सबैभन्दा बढी
‘तीन वर्ष अघि नै ठूलो लगाव र मिहिनेतबाट भरतपुर महानगरले सिटी हल र ६ लेन सडकको आयोजना ल्याएको हो, हामीलाई यसको धेरै माया छ, एउटी आमालाई आफ्नो बच्चाको माया कति लाग्छ, त्यति माया हामीलाई यी आयोजनाको छ’ प्रमुख दाहालले भनिन्, ‘एक दिन आएर शिलान्यास गर्नेलाई आयोजनाको माया के हुन्छ र ? उनले सिटी हल र ६ लेन सडकको जन्मदाता (आमा) भरतपुर महानगर भएको बताइन् ।

पत्रकार सम्मेलनमा भरतपुर २१ का वडाध्यक्ष चित्रसेन अधिकारीले स्थानीय स्वयत्त शासनलाई संघीय सरकारले हस्तक्षेप गरेको बताए । उनले भने, ‘प्रतिनिधि सभा विघटन गरेको सरकारले शिलान्यास गर्दै हिँड्न मिल्दैन, यसको ठूलो मूल्य चुकाउनुपर्छ ।’ पत्रकार सम्मेलन भरतपुर महानगरका प्रवक्ता अरुणपीडित भण्डारीले सञ्चालन गरेका थिए ।