सुख दुःखमा साथ दिएको साथीबाटै मारिए युवक

मकवानपुर । २० वर्षका विकास वाइबा र उही उमेरका शंकर भन्ने भीमराज भोलन असाध्यै मिल्ने साथी हुन् । उनीहरु दुबै सहपाठी पनि हुन् । 

मकवानपुर बकैया गाउँपालिका–४ का यी दुई युवक प्रायः छुटिदैनथे । सँगै खाने र सुत्ने पनि गर्थे । दुबै जना एकअर्काको घरमा आउजाउ पनि गर्थे । उनीहरू सँगै बसेर चुरोट, गाँजालगायतका लागूऔषध पनि सेवन गर्थे। उनीहरूबीच राम्रो चिनजान थियो, गहिरो मित्रता थियो । सुख दुःखमा दुबैले एक अर्कालाई साथ दिँदै आएका थिए । छरछिमेकीहरु भन्ने गर्थे मित्रता त होस् त यस्तो ! विकास र शंकरको जस्तो । 

गत शुक्रबार उनै विकासको हत्या भयो । बकैया गाउँपालिका ४ नयाँदमारका २० वर्षीय विकास वाइबाको हत्याको सूचना मिडियाहरुमा छाउन थाल्यो । विकासको हत्या त उसकै असाध्यै मिल्ने साथी शंकर भन्ने भीमराज भोलनबाट भएको मकवानपुर प्रहरीबाट सार्वजनिक भयो ।

अन्ततः घटनाको दुई दिनपछि विकासको हत्या गर्ने शंकर भनिने भीमराज भोलनलाई प्रहरीले ललीतपुरबाट पक्राउ गरी सार्वजनिक गर्न सफल भएको छ ।  प्रहरीका अनुसार पटकपटक खुकुरी प्रहार गरी भोलनले विकासको हत्या गरेका हुन् । मकवानपुर प्रहरी कार्यालयले आइतबार भोलनलाई सार्वजनिक गरेको छ ।  

कसरी भयो हत्या ?
गत शुक्रबार दिउँसो शंकर विकासको घर पुगे। दुबै जना कुराकानी गर्दै खाजा खाए । खाजा खाएपछि उनीहरू घरबाट निस्किए। घर नजिकैको सिमाद खोलाको बगरस्थित फुटबल चौरमा पुगे । विकासका  भाइहरू फुटबल खेल्दै थिए भने उनकी हजुरआमा पनि त्यहीँ थिइन्।

शंकर र विकास त्यहाँ बसेर चुरोट ताने। चुरोट तान्नेक्रममा उनीहरूबीच विवाद भयो । विवाद गर्दौगर्दै शंकर भनिने भीमराज भोलनले एक्कासि खुकुरी निकालेर विकासमाथि पटकपटक प्रहार गरे । फुटबल खेलेका प्रत्यक्षदर्शीहरुले रोक्न सकेनन् । विकासका साना भाइहरु र हजुरआमाले गुमार माग्न थाले ।

खुकुरी प्रहार गर्ने भोलन फरार भए । मकवानपुर प्रहरीका अनुसार भोलनले विकासको हत्या गर्ने पूर्वयोजना नै बनाएका थिए। उनले घरबाटै खुकुरी बोकेर गएका थिए । ‘आवेगमा आएर होइन, हत्या हत्या नै गर्ने पूर्वयोजना बनाएको पाइयो’ प्रहरीको भनाइ छ । 

घटनापछि शंकर भागेर ललितपुर पुगेछन् । प्रहरीले खोजी कार्य तीव्र पारेर तस्बिरहरु सार्वजनिक गरेपछि ललितपुर बागमती गाउँपालिका २ माल्टाका स्थानीयले शंकरलाई पक्राउ गरी प्रहरीलाई बुझाएका थिए । मकवापुर प्रहरीले शंकरलाई ल्याएर आइतबार सार्वजनिक गरेको हो । 

मकवानपुर प्रहरीका अनुसार प्रारम्भिक अनुसन्धानका आधारमा विकासले शंकरलाई होच्याउने गरेको कारणले हत्या गरेको बयान दिएका छन्। उनीमाथि प्रहरीले कर्तव्य ज्यान सम्बन्धी कसुरमा थप अनुसन्धान अघि बढाइएको प्रहरीको भनाइ छ।