भन्सार कार्यालयका चार जना कर्मचारीलाई कोरोना संक्रमण पुष्टि

विराटनगर । विराटनगर भन्सार कार्यालयमा कार्यरत चार जना कर्मचारीमा कोरोना भाइरस संक्रमण पुष्टि भएको  प्रदेश १ जनस्वास्थ्य प्रयोगशाला विराटनगरले जनाएको छ । कार्यालयका अनुसार उनीहरुको रिपोर्ट आइतबार पोजिटिभ आएको हो ।

केही कर्मचारीमा संक्रमण देखिएपनि भन्सारको काम नरोकिने कार्यालयकी सूचना अधिकारी सुनिता पौडेलले जानकारी दिइन् ।

केहीदिन अघि कर्मचारीमा ज्वरो तथा रुघाको समस्या देखिएपछि गत बिहीबार उनीहरुको स्बाब नमूना संकलन गरिएको थियो । २० जना कर्मचारीको स्वाब संकलन गरिएको र तीमध्ये चार जना पुरुष कर्मचारीमा संक्रमण देखिएको हो ।

उनीहरु २८ देखि ५१ वर्ष उमेर समूहका रहेकाछन् । कार्यालयको क्वाटरमा बसोबास गर्दै आएका उनीहरु चारै जना अहिले होम आइसोलेसनमा रहेका छन् ।

सूचना अधिकारी पौडेलले कर्मचारीमा संक्रमण देखिएपछि हाल आवश्यक सुरक्षा अपनाएर कामलाई निरन्तरता दिइएको जानकारी दिइन्।

हाल कार्यालयमा कार्यरत थप ११ जनाको पीसीआर नमूना संकलन गर्ने तयारी भइरहेको कार्यालयले जनाएको छ।