कोरोना उपचार औषधि किन्न आनाकानी

काठमाडौँ । कोभिड–१९ (कोरोना विषाणु) संक्रमितका लागि अत्यावश्यक औषधि ‘रेमडेसिभिएर’ खरिद गर्न सरकारी निकाय औषधि व्यवस्था विभाग (डिडिए) ले १२ दिनदेखि आनाकानी गरिरहेको छ।

कोरोनाका लागि भारत, पाकिस्तान, बंगलादेशले प्रयोगमा ल्याएको यो औषधि चिकित्सकहरूले नेपालमा पनि प्रयोग गर्नुपर्ने आवश्यकता औंल्याएको छ तर विभागले आनाकानी गर्दा ढिलाइ भइरहेको छ।

स्वास्थ्य मन्त्रालयले जोखिम न्यूनीकरणका लागि तत्कालै सो औषधि खरिद गर्ने प्रक्रियालाई सहजीकरण गरिदिन साउन १३ गते नै निर्णय गरेको भए पनि विभागले अहिलेसम्म त्यसलाई अध्ययन गर्नुपर्ने भन्दै फाइल अड्काएर राखेको छ।

‘महामारीको समयमा औषधि व्यवस्था विभागले फाइल अध्ययन गर्न १० दिनभन्दा बढी समय लगाएको छ। मन्त्रालयले तुरुन्तै कार्यान्वयन गर्नू भनेको विषयमा समेत त्यहाँका कर्मचारीहरूले बिदा बसेर असहयोग गरिरहेका छन्,’ स्रोतले भन्यो, ‘बिरामीले आफैं औषधि खरिद गरेर ल्याउँदा पनि विभागले कुनै प्रक्रिया अघि बढाएको छैन।’  

मन्त्रालय स्रोतका अनुसार साउन १३ गतेअघि मन्त्रालयमा सबै विशषज्ञको छलफल र बैठकबाट ‘रेमडेसिभिएर’ र ‘फाभिपिरभिया’ गरी दुई औषधि कोभिड–१९ मा आपत्कालीन प्रयोगमा ल्याउन सिफारिस गरिएको थियो।

मन्त्रालयले हेल्थ टेक्नोलोजी असिस्टेन्ट कमिटीको साउन ६ गते बसेको बैठकबाट समेत अनुमोदन गरेर मन्त्रालयले साउन १३ गते तुरुन्तै प्रक्रिया थाल्न निर्देशनसहितको पत्र पठाएको थियो। तर विभागले भने प्रक्रिया पूरा गर्ने नाममा अहिलेसम्म फाइल अघि बढाएको छैन। नागरिक दैनिकमा खबर छ ।