प्रचण्ड र नेपालसँग ओलीको छुट्टाछुट्टै डिल, दुवैजनालाई अध्यक्षको प्रस्ताव

काठमाडौं । प्रधानमन्त्री केपी ओली एउटै कार्डले पार्टीका अर्का अध्यक्ष प्रचण्ड र वरिष्ठ नेता माधव नेपालसाग दोहोरो खेल खेलिरहेका छन् । उनले पार्टीभित्र प्रचण्ड र वरिष्ठ नेता नेपाल बीचमा अविश्वास र फुट पैदा गर्ने र सम्बन्धमा ब्रेक लगाउने उद्येश्यले दोहोरो चालबाजी शुरु गरेका हुन् । प्रचण्डलाई भेट्दा ओलीले माधवको पनि कुरा गरेर हुन्छ, तपाई र म मिलौं भैसी तान्दा जुम्रा आफै आईहाल्छन्, मिलेर जाऔं, महाधिवशेनबाट तपाई नै एकल अध्यक्ष बन्ने हो, म सहयोग गर्छु भन्न थालेका छन् । 

त्यही कुरा उनले वरिष्ठ नेता नेपालसँग पनि गर्न थालेका छन् । तपाई र म मिलौं, पूर्व एमालेहरुका बीचमा एकता कायम गरौं, जबज अगाडी बढाऔं, पूर्व माओवादी त्यसमा पनि प्रचण्डको हातमा पार्टी जाने वातावरण बन्न नदिऔं, ओलीले वरिष्ठ नेता नेपालसँग पनि प्रस्ताव गर्न थालेका छन् ।  कुरा हो, साउन ३ र साउन ९ गतेको । साउन ३ मा सचिवालय बैठक बस्नु अगाडी ओलीले प्रचण्डलाई आफनो राजीनामाको विषय छोड्न भन्दै छिटो महाधिवेशन गरेर आफु नेतृत्व सहज हस्तान्तरणको पक्षमा रहेको र महाधिवेशनबाट एकल अध्यक्ष बनाउन तयार रहेको बताएका थिए ।

त्यही प्रस्ताव नेपालसँग पनि ओलीले गरेका छन, साउन ९ मा । दिउँसो प्रचण्डसँगको छलफलमा कुरा नमिलेपछि ओलीले गत साउन ९ गते अबेर राती वरिष्ठ नेता नेपाललाई बालुवाटार बोलाएर प्रचण्डको हातमा पार्टी नेतृत्व जानबाट बचाउन दुई नेता मिलौं भन्ने प्रस्ताव गरेका थिए । नेपालसँगको भेट गोप्य राखिएको थियो । यो न बालुवाटारले खुल्ला गरयो, न वरिष्ठ नेता नेपालले नै ।  नेपालले महाधिवशेन आयोजक समितिको संयोजक बनाउन र महाधिवशेनबाट एकल अध्यक्षमा सहयोग गर्न तयार रहे आफु महाधिवशेनमा जान तयार रहेको भन्दै ओलीसँग प्रस्ताव राखेको बालुवाटार स्रोतले सार्वजनिक गरेको छ ।

तर यस विषयमा नेपालले केही बताएका छैनन् । प्रचण्डसँग पनि प्रधानमन्त्री ओलीले माधवबाट पार्टी नचल्ने, तपाईलाई अध्यक्ष बनाउन आफु तयार रहेको भन्दै प्रस्ताव गरिरहेका थिए । प्रधानमन्त्री दोहोरो चालबाजीमा हुनुहुन्छ भन्ने देखिएकै हो, फेरि उहाँले प्रचण्ड र नेपालका बीचमा वन्दै गएको सम्बन्ध भत्काउन प्रयास गरेको देखिएको छ, नेपाल निकट एक स्थायी समिति सदस्यले सफलखबरसँग भने, उहाँ (प्रधानमन्त्रीको योजना र चालबाजी नेताहरुले बुझ्नु भएको छ । त्यसमा कोही पनि फस्नुहुन्न ।

आज बोलाईएको स्थायी समिति बैठक पनि स्थगित गर्ने रणनीतिमा रहेका ओलीले प्रचण्ड र नेपाल समुहका नेताहरु अब बैठक नरोकि पार्टी बैठक अगाडी बढाउने, नियमित एजेण्डामै बैठक फर्काउने गरी तयारी गरेपछि दुई नेताबीच नै अविश्वास पैदा गराउन सकिन्छ की भनेर नेपालसँग ओलीको ९ साउनमा भएको छलफलको विषय सार्वजनिक गरिदिएका हुन् । तर नेपाल र प्रचण्ड बीच यो भेटघाटका विषयमा एक अर्काका वीचमा छलफल भईसकेकोले यसले सम्बन्धमा कुनै खटपट ल्याउन नसक्ने नेपाल निकट ति स्थायी समिति सदस्यको भनाई छ । 

ओली आफनो सत्ता बचाउका लागि जहिल्यै अनेक योजनामा लागेका देखिन्छन् । उनले कहिले वामदेवलाई प्रधानमन्त्री बनाउने प्रस्ताव अगाडी ल्याए, कहिले उनै वामदेवलाई राष्ट्रिय सभा सदस्य बनाउन पार्टीले गरेको सर्वसम्मत निर्णयमा टाँग हाल्ने काम गरे । कहिले अर्ली महाधिवेशनको प्रस्ताव अगाडी सारेर अगाडी आएका छन त कहिले के तुरुप फालेर अगाडी आउने प्रयास गरिरहेका छन् । अहिले उनले मंसिरमा सम्भव नै नहुने महाधिवेशनको फन्डा अगाडी सारेर आएका छन् । 

प्रधानमन्त्री ओली पार्टीभित्र आफुमाथी आइलाग्न सक्ने जोखिमबाट बच्नका लागि बैठक छल्ने, आफुइतर समुहका नेताहरुलाई एक्लाएक्लै बोलाएर भेट्ने, फकाउने, गलाउने र तर्साउने रणनीति सम्ममा लागेका छन् । अहिले सहमति नजुटे फेरि पार्टी विभाजन हुन सक्ने देखि संसद विघटन गर्नेसम्मको धम्की पार्टी नेताहरुलाई एकल रुपमा भेट गर्दा दिन थालेका छन् । उनको यो अस्त्रले प्रचण्ड नेपाल समुहका बीचमा वनेको गठवन्धन कति भत्काउन सक्छन् ? त्यो भने हेर्न उनको पार्टीभित्रै उठेको राजीनामाको विषयले कसरी बैठान लिन्छ, त्यही आधारमा थाहा हुने देखिएको छ ।