देवघाटधाममा खतराको बिन्दु काट्यो नारायणी नदीले, नारायणी पुलमा चेतावनीको तहमाथि पानी

चितवन । केही दिनदेखिको अविरल वर्षासँगै नदीमा पानीको सतह बढेपछि नारायणी नदीको सतहले सोमबार खतराको बिन्दु पार गरेको छ । 

देवघाटधाममा रहेको जलमापन केन्द्रका अनुसार, देवघाटनजिक नारायणी नदीको सतह आठ दशमलव ५१ मिटर पुगेको छ । यहाँ आठ मिटरलाई खतराको बिन्दु मानिन्छ । नारायणी पुलमुनि नदीको सतह ११ मिटर पुग्यो भने चेतावनीको तह मासिनन्छ । यहाँ पानीको सतह ११ दशमलव ७२ मिटर पुगेको छ । 

जलस्तर बढ्दो क्रममा नै रहेको छ । नारायणी नदी उर्लिएसँगै चितवनको पश्चिमी क्षेत्र मङ्गलपुर, गुञ्जनगर, दिव्यनगर र मेघौलीमा कटान र डुबानको खतरा बढेको छ । नारायणी पारि नवलपरासी (सुस्तापूर्व) जिल्लाका विभिन्न क्षेत्रमा समेत बाढीको जोखिम बढेको छ ।

जिल्ला प्रशासन कार्यालय चितवनले सूचना निकालेर नदीतटीय क्षेत्रमा बसोबास गर्ने स्थानीयलाई सावधानी अपनाउन अपिल गरेको छ । चितवनका प्रमुख जिल्ला अधिकारी नारायणप्रसाद भट्टराईले निरन्तर वर्षा भइरहेका कारण बाढीको त्रास कायम रहेको भन्दै सबैलाई सजग रहन अनुरोध गरे ।

त्रिशुलीले छोयो झोलुङ्गे पुल

भरतपुर महानगरपालिका २९, सिमलतालमा रहेको झोलुङ्गे पुलको बीच भागलाई त्रिशुली नदीले नाघेको छ । सिमलताललाई तनहुँसँग जोड्ने पुलको मध्यभागमा बाढीले हिर्काइरहेकोले पुल बग्ने खतरा बढेको छ । बाढीले पुल छोएपछि त्यहाँ आवतजावत बन्द भएको छ । त्रिशुली नदीको सतह बढेपछि भरतपुर महानगरपालिका १, दासढुङ्गामा रहेको पक्की पुलको पिल्लर पुरै पानीमा डुबेको छ । 

नारायणगढ–मुग्लिन सडकखण्डमा पहिरो

अविरल वर्षाले नारायणगढ–मुग्लिन सडकखण्डको चारकिलोमा ठूलो पहिरो गएको छ । चारकिलोमा गएको पहिरोका कारण बिहानैबाट अवरुद्ध सडक साँझसम्म खुल्न सकेको छैन । इच्छाकामना गाउँपालिका ६ मा पर्ने चारकिलोमा यसअघि पनि सानातिना पहिरो जाने गरेको थियो ।