अशोक राईलाई बाहिर राखेर मोर्चा घोषणा गर्दै मधेश केन्द्रित सात दल

काठमाडौंँ। तराई-मधेश केन्द्रित ७ राजनीतिक दलले भोलि बिहीबार मोर्चा घोषणा गर्ने तयारी गरेका छन् । जनमत पार्टी, जनता समाजवादी पार्टी (जसपा) नेपाल, लोकतान्त्रिक समाजवादी पार्टी (लोसपा) नेपाल, नागरिक उन्मुक्ति पार्टी, राष्ट्रिय मुक्ति पार्टी, जनता प्रगतिशील पार्टी र तराई मधेश लोकतान्त्रिक पार्टी(तमलोपा)का अध्यक्षहरूको उपस्थितिमा मोर्चा घोषणा हुने भएको हो ।

राष्ट्रिय मुक्ति पार्टीका नेता केशव झाले भोलि सातै दलका अध्यक्षहरूको उपस्थितिमा मोर्चा घोषणा हुने तयारी रहेको बताए ।यसअघि ती दलका कार्यदलको विभिन्न बैठक बसेर मोर्चाको आचारसंहिता, मोर्चाको नाम आदिबारे छलफल गरेको थियो ।

मोर्चाको नाम, अवधारणा तथा आचारसंहितासहितको सबै कागजात भोलि नै सार्वजनिक गरिने जनता प्रगतिशील पार्टीका अध्यक्ष हृदयेश त्रिपाठीले बताए ।अशोक राई नेतृत्वको जसपालाई छुटाइएको विषयमा त्रिपाठीले लोकान्तरसँग भने, ‘उहाँहरू अब अहिले छुट्नु भयो । पछि उहाँहरूलाई समेट्न सकिन्छ ।’

यता जसपाकी नेत्री रेणु यादवले भने पछिल्लो एउटा बैठकमा मात्र नगएको अवस्थामा आफूहरूलाई किन छुटाइयो भन्ने बुझ्न बाँकी रहेको बताइन् । यसअघि मधेश आन्दोलनको क्रममा संयुक्त लोकतान्त्रिक मधेशी मोर्चा गठन गरिएको थियो ।