काठमाडौं । भारतीय ग्याङ स्टारका नाइके लरेन्स विश्नोई र अनमोल विश्नोईको नाम लिंदै फिरौती माग गरेको आरोपमा एक नेपाली युवा पक्राउ परेका छन् ।
पक्राउ पर्नेमा सुर्खेतको भेरीगंगा नगरपालिका–७ काठेघारीका ४१ वर्षीय रामबहादुर बिसी (बुढा क्षेत्री) रहेका छन् । पछिल्लो समय कोहलपुर नगरपालिका-५ मा डेरा गरी बस्दै आएका बिसी बाँकेमा पक्राउ परेका हुन् ।
उनलाई इलाका प्रहरी कार्यालय कोहलपुर, बाँकेबाट खटिएको प्रहरी टोलीले पक्राउ गरेको हो । उनले विश्नोईको नाम लिँदै पाँच करोड भारु (८ करोड नेपाली रुपैयाँ) फिरौती माग गरेको पाइएको कोहलपुरका डीएसपी धर्मराज भण्डारीले बताए ।
सामाजिक सञ्जाल ह्वाट्स एप प्रयोग गरी उनले फिरौती माग गरेको आरोप छ । उनले विदेशी नम्बरको ह्वाट्स एपबाट फोन गरेर धम्क्याउने गरेको पाइएको प्रहरीको भनाइ छ । पक्राउ परेका क्षेत्री पटकपटक पक्राउ परेर मुद्दा चलेका हुन् । प्रहरीको क्रिमिनल रेकर्ड सिस्टम (सीआरएस)मा उनको आपराधिक विगत देखिएको छ ।
उनीविरुद्ध इलाका प्रहरी कार्यालय काकडभिट्टाबाट २७ साउन २०६१ मा जीउ मास्ने बेच्ने उद्योगको कसुरमा मुद्दा चलेको थियो । त्यतिबेला एक नेपाली युवतीलाई ललाई फकाई विवाह गर्छु भन्दै काकडभिट्टाबाट भारत लगेको आरोप छ ।
त्यसैगरी ८ चैत २०६२ मा सर्वसाधारणलाई धम्की दिंदै चन्दा असुली गरेको आरोपमा जिल्ला प्रहरी कार्यालय झापाबाट उनीविरुद्ध मुद्दा चलेको थियो । यसको दुई वर्षपछि फिरौती रकम असुलेको आरोपमा काठमाडौंबाटै उनीविरुद्ध मुद्दा चलेको पाइएको छ ।
९ भदौ २०६४ मा महानगरीय प्रहरी परिसर काठमाडौं (हाल जिल्ला प्रहरी परिसर)बाट उनीविरुद्ध फिरौती लिएको आरोपमा मुद्दा चलेको थियो । एक व्यक्तिलाई नियन्त्रणमा लिएर ट्याक्सीमा राख्दै धम्क्याएर फिरौती असुलेको आरोप थियो ।
यसका साथै उनीविरुद्ध कर्तव्य कसुरको मुद्दामा पनि मुद्दा चलेको पाइएको छ । २०६४ मा भएको संविधानसभाको निर्वाचनमा एक व्यक्तिलाई गोली हानी हत्या गरेको आरोप उनीमाथि लागेको थियो ।
२७ चैत २०६४ मा संविधानसभाका उम्मेदवार ऋषि शर्मा प्रचार प्रसार सकेर आउँदै गर्दा सुर्खेतको मेहलकुना जहरेबजार नजिक लोदे भन्ने ठाउँमा शर्माको गोली हानी हत्या भएको थियो । त्यसबेला इलाका प्रहरी कार्यालय छिन्चुबाट उनीविरुद्ध मुद्दा चलेको थियो ।
यसपछि पनि २०६५ चैतमा द्वन्द्वपीडित सेना प्रहरीको आन्दोलनको क्रममा प्रहरीको हतियार नै खोसेका थिए । यो केशमा उनीविरुद्ध काठमाडौंबाट मुद्दा चलेको थियो ।
अहिले पक्राउ परेका क्षेत्रीले यसअघि माओवादी केन्द्रका नेता शक्तिबहादुर बस्नेतलाई समेत गोली हानेका थिए । कोटेश्वरको निखिलेश्वर मन्दिरमा बस्नेतलाई उनले गोली हानेका हुन् । यो केशमा उनलाई ५ वर्ष जेल र ६० हजार जरिवाना तोकिएको थियो । जेल भुक्तान गरेर उनी २८ फागुन २०७० मा छुटेका थिए ।
उनी नेपाली आर्मीका भगौडा रहेको पाइएको छ । २०५९ सालमा जागिर छाडेर भागेका व्यक्ति रहेको पाइएको छ । आर्मीबाट भागेपछि उनी विभिन्न नामले आपराधिक समूहमा लागेर अपराधको गतिविधि गर्दै आएको प्रहरीको भनाइ छ ।आपराधिक क्रियाकलाप गर्ने उदेश्यले उनले भारतीय आधारकार्ड समेत लिएको पाइएको प्रहरीको भनाइ छ ।
क्षेत्रीले विश्नोईको नाम लिएर धम्क्याएका थिए । विश्नोई समूह भारतीय ग्याङ्स्टार हो । फिरौती माग्नेदेखि हत्यासम्ममा यो समूह संलग्न थियो । उनी सन् २०१४ देखि भारतीय कारागारमा छन् । २९ मे २०२२ मा पञ्जाबको संगर सिद्धु मुसेवालाको हत्या, भारतीय नायक सलमान खानलाई ज्यान मार्ने उद्योग गरेको, बाबा सिद्धिकी हत्या जस्ता आरोप विश्नोई समूहलाई लागेको छ ।
यता धम्कीका लागि नाम लिइएको अनमोल भने लरेन्स विश्नोईका भाइ हुन् । उनले पनि व्यायारी र उद्योगीसँग फिरौती माग्ने धम्क्याउने गरेको आरोप छ ।
प्रतिक्रिया दिनुहोस
सफल खबर संवाददाता
बुधबार, २० चैत्र २०८१, १३ : ३९
लेखकबाट थप
सम्बन्धित समाचारहरु
उत्तर कोरियाले थप तीन हजार सैनिक रूस पठाउने
नेपाली सेनाले किन बोलायो अमेरिकाका यी चार सैनिक ?
सैनिक अधिकृतका लागि नेपालमा सञ्चालन हुने उच्चस्तरको तालिम नगरकोटमा
चितवनमा कारले मोटरसाइकललाई ठक्कर दिँदा सैनिक जवानको मृत्यु
लिवियामा तैनाथ नेपाली शान्ति सैनिकहरूको अदलीबदली
मणिपुरको सीआरपीएफ क्याम्पमा आक्रमण, दुई सैनिकको मृत्यु