परिवार पाल्न गाह्रो भो : चेपाङ समुदाय

मुग्लिन । कोभिड–१९ं को जोखिम हुन नदिन लकडाउन जारी रहदा दैनिक ज्यालादारी मजदुरी गरेर जीवनयापन गर्दै आएका परिवार समस्यामा परेका छन् । चितवनको इच्छाकामना गाउँपालिकाका चेपाङ समुदाय पनि यतिबेला  समस्यामा परेका छन् । 

    पाखोबारीमा उब्जाएको कोदो, मकैले ६ महिना पनि खान नपुग्ने ती समुदायले बाँकी छ महिना भने अन्यत्र गएर दैनिक ज्याला मजदुरी गरेर परिवार पाल्ने गर्छन् । तर अहिले ज्याला मजदुरी गर्न नपाएपछि उनीहरुलाई बिहान बेलुका छाक टार्न मुस्किल परेको छ । 

    गाउँपालिकाले एक महिनाअघि १० केजी चामल वितरण गरेका थिए । तर १० केजी चामल सकिसकेकाले अब घरमा चुल्हो बल्न नसक्ने अवस्था आएको दैनिक ज्याला मजदुरी गरी चारजनाको परिवार पाल्दै आउनुभएको इच्छाकामना–३ धुषाका गमबहादुर चेपाङले बताउनुभयो । अहिले काम गर्न नै नपाएपछि बिहान बेलुका छाक टार्न मुस्किल भएको उहाँको भनाइ छ । 

    उहाँले भन्नुभयो, “बारीको उब्जनीले ६ महिना पनि खान मुस्किल हुन्छ बाँकी ६ महिना बाहिर जिल्लामा गएर ज्याला मजदुरी गरेर परिवार पाल्ने हो तर अहिले अनिकालकै समयमा ज्याला मजदुरी ठप्प हुदाँ घरमा चुल्हो बल्न गाह्रो भएको छ गाउँपालिकाले दिएको १० केजी चामल पनि सकियो ।”

    अर्का स्थानीय सिद्धान्त चेपाङका अनुसार यहाँका ती समुदायका केहीले तरकारी खेती पनि गर्छन् तर फलाएको तरकारीसमेत बजारमा बिक्री गर्न पाएनन् । बेच्ने बेला भएको काँक्रो बोटमै कुहिएर खेर गएको उहाँको भनाइ छ ।

    उहाँले अब सरकारले आफूहरुलाई काम (रोजगार) दिनुपर्ने बताउनुभयो । दैनिक काम गर्न पाए मात्र परिवार पाल्न सकिने यहाँका  ती समुदायको भनाइ छ । 

    जग्गा जमिनको कमी भएका कारण पनि कृषिमा आत्मर निर्भरसमेत बन्न नसकेको पनि उनीहरु बताउँछन् । 

    धुषमा मात्र ५३ घर ती समुदायका परिवार छन् । अधिकांशले दैनिक ज्यालादारी गरेर जीवन निर्वाह गर्दै आएका छन् । 

    गाउँपालिकाका अध्यक्ष गीताकुमारी गुरुङले भने चेपाङ समुदाय मात्र नभएर दैनिक ज्यालादारी गरी जीवन निर्वाह गर्दै आएका सम्पूर्ण परिवारका सदस्यलाई  गाउँपालिकाले विकास निर्माणका काममा लगाउने जानकारी दिनुभयो । अब गाउँपालिकाले विकास निर्माणका काम पनि सञ्चालन गर्ने र गाउँपालिकाभित्रका विपन्न दैनिक ज्यालादारी गरी जीवन निर्वाह गर्दै आएका विपन्नलाई रोजगार दिइने  बताउनुभयो । 

    उहाँले भन्नुभयो, “अब विकास निर्माणका कामलाई विस्तारै कोरोनासँग जोगिँदै आवश्यक सतर्कता अपनाई सञ्चालन गर्दैछौँ, सडक खाने पानी र बिजुलीलगायतका कामलाई निरन्तरता दिनेछौँ विकास निर्माणसँगै रोजगार सिर्जना हुनेछ जसले गर्दा राहत वितरण गर्नुपर्ने सङ्ख्या पनि घट्ने छ ।”

    तत्काल चुल्हो बल्ने अवस्था नआए वडा कार्यालय अर्थात् गाउँपालिकामा सम्पर्क गर्न पनि उहाँले अनुरोध गर्नुभयो । त्यस्तो अवस्थामा आएमा तत्काल राहत उपलब्ध गराउने बताउनुभयो ।  (रासस)