चितवन । पूर्व उर्जामन्त्री तथा नेकपाका प्रभावशाली नेता जनार्दन शर्माले सामुदायिक विद्यालयको गुणस्तरमाथि प्रश्न उठाउँदै सामुदायिक विद्यालय माथि उठ्न नसक्नुका कारणहरुको खोजी गर्नुपर्ने बताउनुभएको छ ।
आज नारायणी नमुना मावि भरतपुरमा भएको ४० औं राष्ट्रिय शिक्षा दिवस तथा अन्तर्राष्ट्रिय साक्षरता दिवसको उपलक्ष्यमा आयोजित कार्यक्रमको उद्घाटन गर्दै नेता शर्माले समृद्ध नेपाल र सुखी नेपालीसँग शिक्षाको तालमेल मिल्नुपर्ने बताउनुभएको छ ।
कार्यक्रममा उहाँले भन्नुभयो, ‘सामुदायिक विद्यालय अझै कमजोर छन्, हामी गुणस्तरमा चुकिरहेका छौँ, अब यसको खोजी गरिन जरुरी छ ।
उहाँले सामुदायिक विद्यालयहरु सधैँभर कमजोर भएर बस्न नसक्ने बताउनुभयो । उहाँले एकदुई वटा सामुदायिक स्कुल राम्रो भएर मात्र नपुग्ने बताउनुभयो । कार्यक्रममा उहाँले भन्नुभयो, ‘शिक्षालाई नैतिकता, राष्ट्रियता र आत्मनिर्भरतासँग जोड्नुपर्छ ।’
कार्यक्रममा पूर्वमन्त्री शर्माले अबको शिक्षाले देशलाई चाहिने जनशक्ति उत्पादन गर्न सक्ने खालको हुन आवश्यक भएको बताउनुभयो । उहाँले भन्नुभयो, ‘कमीकमजोर कहाँ छन् ? खोतल्नुपर्छ । फड्को मार्ने खालको शैक्षिक गुणस्तर सुधार गर्न आवश्यक छ ।’
कार्यक्रममा उहाँले विद्यार्थी देशपति माया र समर्पित हुने भावनाको विकास गराउँदै शिक्षाको गुणस्तरको लागि अघि बढ्न शुभकामनासमेत दिनुभएको थियो । कार्यक्रममा उहाँले भन्नुभयो, ‘सबै नेतृत्वको विकास शिक्षाले नै गर्ने भएकोले यसलाई अघि बढाउनुको विकल्प छैन, सबै लाग्नुपर्छ नेपालको शिक्षाले अवश्य कोल्टे फेर्नेछ ।’
प्रतिक्रिया दिनुहोस
सफल खबर संवाददाता
आइतबार, २२ भदौ २०७६, १४ : १४
लेखकबाट थप