एमाले-कांग्रेस गठबन्धनलाई हराउँदै वन वाटिकाको अध्यक्षमा विप्लवनिकट पाण्डे विजयी

बुटवल । सत्तारुढ प्रमुख दुई दल नेकपा एमाले र नेपाली कांग्रेसको गठबन्धनलाई हराउँदै शंकरनगर वन बिहार तथा अनुसन्धान केन्द्र (वन वाटिका)को अध्यक्षमा नेत्रविक्रम चन्द विप्लव निकट उम्मेदवार विजयी भएका छन् । सचिवमा पनि गठबन्धनका उम्मेदवारलाई बागी उम्मेदवारले फराकिलो मतान्तरले पराजित गरेका छन् ।

केन्द्रको चौथो अधिवेशनबाट अध्यक्षमा एमाले-कांग्रेस गठबन्धनका उम्मेदवार इन्जिनियर किरण खरेललाई १३५ मतान्तरले पराजित गर्दै  विप्लव निकट उम्मेदवार खिमलाल पाण्डे विजयी भएका हुन् । पाण्डे यसअघि उपाध्यक्ष थिए भने खरेल कार्यसमिति सदस्य थिए ।

पाण्डेले ३९६ मत पाएर निर्वाचित हुँदा खरेलले २३४ मत पाए । राष्ट्रिय जनमुक्ति पार्टीकी उम्मेदवार टिकादेवी आलेले ३९ मत पाइन् । अध्यक्षमा निर्वाचित पाण्डेलाई माओवादी केन्द्रले उम्मेदवारी नै फिर्ता लिएर साथ दिएको थियो भने एमाले र कांग्रेसका असन्तुष्ट पक्षले आन्तरिकरुपमा साथ दिएका थिए ।

यो चुनावमा नेकपा एमालेका पोलिटब्युरो सदस्य एवं लुम्बिनीका पूर्वमुख्यमन्त्री लिला गिरी, एमालेबाट निर्वाचित प्रतिनिधि सभा सदस्य एवं तिलोत्तमाका पूर्वमेयर वासुदेव घिमिरे र तिलोत्तमाका हालका मेयर रामकृष्ण खाँणले पनि मतदान गरेका थिए ।

७७५ मतदाता रहेको केन्द्रको चुनावमा ६६१ मत खसेको निर्वाचन समितिका संयोजक मोहन चापागाईले जानकारी दिए ।उपाध्यक्षमा एमाले-कांग्रेस गठबन्धनबाट कांग्रेसका मिनप्रसाद देवकोटा निर्वाचित भए भने सचिवमा सत्ता गठबन्धनकी कमला पाण्डेलाई पराजित गर्दै कांग्रेसबाट बागी उम्मेदवार बनेका विदुर केसी विजयी भए ।

उपाध्यक्षमा देवकोटाले ३७८ मत, गठबन्धनका बागी उम्मेदवार लेखबहादुर खड्काले १३४ मत र राष्ट्रिय जनमुक्ति पार्टीकी चन्दा थापाले १०९ मत पाए । सचिवमा केसीले ३७९ मत पाएर निर्वाचित हुँदा पाण्डेले १८८ मत र राष्ट्रि जनमुक्ति पार्टीकी हिरामति थापाले ५७ मत पाइन् ।

कोषाध्यक्षमा एमाले–कांग्रेस गठबन्धनबाट एमालेका मनिराम भट्टराई ३८५ मत पाएर निर्वाचित हुँदा माओवादी केन्द्रका सौरभ भुसालले १७५ र राष्ट्रिय जनमुक्ति पार्टीका उदलसिंह थापाले ६३ मत पाए ।

दुई जना लेखा समिति सदस्यमा स्वतन्त्र उम्मेदवार सन्दीप भट्टराई (३१३ मत) र एमाले–कांग्रेस गठबन्धनबाट विष्णुप्रसाद सुवेदी (२११ मत) विजयी भए । लेखा समिति सदस्यमा गठबन्धनकी मिठुमाया पौडेल (२०२ मत) ,माओवादी केन्द्रकी इन्दु थापा मगर (१४८ मत),स्वतन्त्र उम्मेदवार शंकर पाण्डे (१४८) र राष्ट्रिय जनमुक्तिकी सीता श्रीस (७२ मत) पराजित भए । लेखा समिति संयोजकमा कांग्रेसका प्रदीप पराजुली निर्विरोध निर्वाचित भएका थिए ।

७ जना कार्यसमिति सदस्यमा भने एमाले–कांग्रेस गठबन्धनबाट पाँच जना निर्वाचित भएका छन् । जसमा विन्दु ढकाल, लक्ष्मण मल्ल, सरस्वती बराल, शंकर भण्डारी र पार्वती क्षेत्री छन् । दुई जनामध्ये राममाया पौडेल गठबन्धनबाट बागी उम्मेदवार हुन् भने माओवादी केन्द्रकी ज्योतिमाया थापा निर्वाचित भएकी छन् ।

वार्षिक पाँच लाख पर्यटक घुम्न आउने वन वाटिका लुम्बिनी प्रदेशकै ठूलो र फराकिलो क्षेत्रफल भएको उद्यान हो । शंकरनगर सामुदायिक वन क्षेत्रभित्र रहेको यो उद्यान २०६२ सालदेखि सञ्चालनमा आएको हो ।

वनवाटिकाका मतदाता स्थानीय बुद्धिजिवी बाला कुँवरले उपभोक्ता र समुदायका साझा संस्थाहरुमा राजनीतिक दलहरुले भागबन्डा गरेर पद बाँडेको मतदाताले नरुचाएको चुनावको मत परिणामले पुष्टि गरेको टिप्पणी गरे । यसअघि शंकरनगर खानेपानीको चुनावमा पनि कांग्रेस एमाले गठबन्धनका आधिकारिक उम्मेदवारलाई बागी उम्मेदवारले पराजित गरेका थिए ।