अमेरिकामा हेलिकप्टर दुर्घटना, ३ जनाको मृत्यु

अमेरिका । अमेरिकामा विमान दुर्घटनाको शृङ्खला जारी छ । मिसिसिपीमा एउटा हेलिकप्टर दुर्घटनामा परेको खबर छ । सोमबार मेडिकल ट्रान्सपोर्ट हेलिकप्टर दुर्घटनाग्रस्त हुँदा एक जना पाइलट र अस्पतालका दुई कर्मचारीको मृत्यु भएको हो ।

मिसिसिपी मेडिकल सेन्टर विश्वविद्यालयका प्रवक्ताले विमानमा सवार सबैको मृत्यु भएको पुष्टि गरेका छन् । म्याडिसन काउन्टीमा दुर्घटना हुँदाको समयमा हेलिकप्टरमा कोही पनि बिरामी सवार नरहेको विश्वविद्यालयले पहिलेको एक विज्ञप्तिमा भनेको थियो ।

दुर्घटनामा मृत्यु भएका तीन जनाको परिवारलाई जानकारी गराइएको छ । तर गोपनीयताका कारण अधिकारीहरूले उनीहरूको नाम सार्वजनिक गरेका छैनन् । विश्वविद्यालयले दुर्घटनाको कारण बताएको छैन ।