आँखा अस्पताललाई ८० लाख बढीको उपकरण सहयोग

बागलुङ । लायन्स क्लब इन्टरनेसनल फाउण्डेशनले बागलुङस्थित धौलागिरि आँखा अस्पताललाई रु ८० लाख ८० हजार नौ सय ३४ बराबरको स्वास्थ्य उपकरण सहयोग गरेको छ । 

उक्त सहयोग परियोजनाको शुभारम्भसँगै बिहीबार क्लबका अन्तर्राष्ट्रिय निर्देशक बालकृष्ण बुर्लाकोटीले नेत्र ज्योति सङ्घ, बागलुङका अध्यक्ष विन्दुसागर राजभण्डारीलाई आँखा उपचारसम्बन्धी उपकरण हस्तान्तरण गरेका हुन् ।

निर्देशक बुर्लाकोटीले धौलागिरि क्षेत्रका बागलुङ, पर्वत, म्याग्दी, मुस्ताङसहित गुल्मी र अर्घाखाँची जिल्लाका सर्वसाधारणलाई लक्षित गरी उक्त सहयोग परियोजना भित्र्याइएको बताए । “आँखाका बिरामीका लागि गुणस्तरीय स्वास्थ्य सेवा प्रदान गर्ने उद्देश्यले यी उपकरणहरु सहयोग गरिएको छ, यस क्षेत्रका बिरामीलाई उपचारका लागि पोखरा, काठमाडौँ जानुपर्ने बाध्यता अब कम हुनेछ”, उनले भने । 

निर्देशक बुर्लाकोटीले धौलागिरि आँखा अस्पतालको स्तरोन्नतिका लागि लाइन्स इन्टरनेसनका तर्फबाट आगामी दिनमा थप सहयोग गर्ने प्रतिबद्धता जनाए । उनले मानवीय सेवाका क्षेत्रमा लायन्स इन्टरनेसनले नेपालमा रु दुई अर्ब बढीको परियोजना सञ्चालन गरिरहेको जानकारी दिए । लायन्स क्लब इन्टरनेसनल डिस्ट्रिक ३२५ के नेपालको विशेष पहलमा धौलागिरि आँखा अस्पताललाई ती उपकरण सहयोग गरिएको परियोजना प्रमुख दुर्गा कुँवरले बताए । 

उनले आफूहरुको अथक मेहनतबाट अस्पतालमा लाइन्स इन्टरनेसनल फाउण्डेशको सहयोग परियोजना आएको बताए । “यो धौलागिरि क्षेत्रमा लायन्स इन्टरनेसनलले गरेको अहिलेसम्मकै ठूलो सहयोग हो, आधुनिक उपकरणको सहायताबाट बिरामीलाई गुणस्तीय सेवा दिन अस्पतालाई ठूलो मद्दत पुगेको छ”, उनले भने। हिमालय आँखा अस्पतालको प्राविधिक सहयोगमा नेपाल नेत्र ज्योति सङ्घले विसं २०७७ देखि धौलागिरि आँखा अस्पताल सञ्चालनमा ल्याएको थियो । 

उक्त अस्पतालले शल्यक्रियालगायतका सेवा प्रदान गर्दै आएको सङ्घका जिल्ला अध्यक्ष राजभण्डारीले जानकारी दिए । उनका अनुसार सङ्घले निःशुल्क आँखा उपचार शिविर पनि सञ्चालन गर्दै आएको छ । दक्ष चिकित्सकमार्फत अस्पतालबाट सेवा प्रदान भइरहेको भन्दै थप जनशक्तिको खाँचो रहेको अध्यक्ष राजभण्डारीले बताए ।