पछिल्लो ६ महिनामा ११ अर्बभन्दा बढी नाफा गरेको प्राधिकरणको दाबी

काठमाडौं।  नेपाल विद्युत प्राधिकरणले चालू आर्थिक वर्ष २०८१/८२ को पहिलो ६ महिनामा ११ अर्ब ३६ करोड रुपैयाँ नाफा भएको दाबी गरेको छ । सूचनाको हकअन्तर्गत प्राधिकरणले सार्वजनिक गरेको विवरणअनुसार, विद्युत बिक्री, ब्याज तथा अन्य स्रोतबाट ७० अर्ब ४४ करोड रुपैयाँ आम्दानी गरेको हो ।

यस अवधिमा विद्युत खरिद, प्रशासनिक खर्च तथा विभिन्न आयोजना सञ्चालनमा गरी कुल ५९ अर्ब ८ करोड रुपैयाँ खर्च गरिएको छ । सोहीअनुसार, साउनदेखि पुस मसान्तसम्मको अप्रशोधित नाफा (करकट्टी नगरी गणना गरिएको) ११ अर्ब ३६ करोड रुपैयाँ रहेको छ ।

२०७२/७३ मा ८ अर्ब ८९ करोड रुपैयाँ घाटामा रहेको नेपाल विद्युत प्राधिकरण त्यसपछिका वर्षहरूमा निरन्तर नाफामा रहेको प्राधिकरणले दाबी गरेको छ ।

पछिल्लो आर्थिक वर्ष २०८०/८१ मा प्राधिकरणले १४ अर्ब ४६ करोड रुपैयाँ नाफा कमाएको थियो । आर्थिक वर्ष २०७३/७४ मा १ अर्ब ५० करोड, २०७४/७५ मा ३ अर्ब ४४ करोड, २०७५/७६ मा ९ अर्ब ८१ करोड, २०७६/७७ मा ११ अर्ब ७५ करोड, २०७७/७८ मा ६ अर्ब ९ करोड, २०७८/७९ मा १३ अर्ब ३७ करोड, २०७९/८० मा ९ अर्ब ४१ करोड नाफा गरेको प्राधिकरण चालू आर्थिक वर्षमा पनि उच्च नाफा आर्जन गर्ने अवस्थामा रहेको देखिन्छ ।

प्राधिकरणले गरेको दाबीअनुसार चालू आर्थिक वर्षको पहिलो ६ महिनामा विद्युत बिक्रीबाट ५३ अर्ब १८ करोड रुपैयाँ आम्दानी भएको छ ।यस अवधिमा प्राधिकरणले सहायक तथा सम्बन्धित कम्पनीहरूबाट १ अर्ब १५ करोड रुपैयाँ बराबरको विद्युत खरिद गरेको छ ।

त्यस्तै, निजी उत्पादक कम्पनीहरूबाट ५ अर्ब १६ करोड रुपैयाँ बराबरको विद्युत खरीद गरिएको छ । विद्युत खरिदका लागि प्राधिकरणले ३४ अर्ब ८४ करोड रुपैयाँ खर्च गरेको छ भने भारतबाट २४ करोड २० लाख युनिट विद्युत आयात गरी १ अर्ब ६५ करोड रुपैयाँ भुक्तानी गरिएको छ ।

भारतलाई विद्युत निर्यातबाट पनि प्राधिकरणले आम्दानी गर्न सफल भएको छ । साउनदेखि पुससम्ममा १ अर्ब ७७ करोड १८ लाख युनिट विद्युत भारत निर्यात गरी १३ अर्ब ९ करोड रुपैयाँ आम्दानी गरिएको छ । निर्यात आम्दानी बढ्दै गएकाले आर्थिक अवस्था थप मजबुत हुने प्राधिकरणको दाबी छ ।

चालू आवको पहिलो ६ महिनामा सरकारले विनियोजन गरेको विकास बजेटअन्तर्गत विभिन्न आयोजनाहरू तथा विद्युतीकरणमा प्राधिकरणले १३ अर्ब ३५ करोड रुपैयाँ खर्च गरेको छ । त्यस्तै, वैदेशिक सहायता अन्तर्गत १० अर्ब ४९ करोड रुपैयाँ विभिन्न आयोजनाहरूमा खर्च भएको छ । भारतलाई निर्यातबाट आम्दानी बढ्दै गएको हुँदा आगामी दिनमा थप सुधार हुने अनुमान गरिएको छ ।