सामाजिक अधिकार एक सेन्टिमिटर पनि तलमाथि हुँदैन : प्रधानमन्त्री ओली

काठमाडौँ । प्रधानमन्त्री केपी शर्मा ओलीले आफूहरूले परिपूर्ण डेमोक्रेसी चाहेको बताएका छन् । बिहीबार काठमाडौँमा भएको डिजिटल अपराधसम्बन्धी अन्तर्राष्ट्रिय सम्मेलनलाई सम्बोधन गर्दै प्रधानमन्त्री ओलीले राजनीतिक परिवर्तन भए पनि त्यसले मात्र मानिस सुखी र खुसी हुन नसक्ने भएकाले परिपूर्ण डेमोक्रेसीले मात्र मानव खुसी र सुखी बन्न सक्ने बताएका हुन् ।

उनले मानिसलाई खुसी हुन नदिने तत्त्व अपराध एक रहेको भन्दै प्रधानमन्त्री ओलीले मानव जाति अझै पनि अभाव र भोकमरीमा तड्पिरहनुपरेको बताए ।  ‘मानिस अभाव र भोकमरीमा तड्पिरहेको छ भने अरू कुराले मात्र सुखी हुन सक्दैन’, प्रधानमन्त्री ओलीले भने–  ‘हामी परिपूर्ण डेमोक्रेसी चाहान्छौ ।

सामाजिक क्षेत्रका जीवन उन्नत र सम्पन्न हुनुपर्छ । जैविक र मानवीय आवश्यकताको सहज आपूर्तिको परिपाटी हुनुपर्छ र मात्र समाजलाई समृद्ध, सन्तुष्ट र खुसी राख्न सक्छौँ।

साइन्स एन्ड टेक्नोलोजीले मानव जातीलाई सुख सुविधा दिने भए पनि यसको दुरुपयोगबाट अपराध समेत हुनसक्ने भएकाले त्यसतर्फ सचेत हुन जरुरी रहेको प्रधानमन्त्रीको भनाइ छ । उनले बेथितिबाट राम्रा काम प्राप्त गर्न नसकिने भएकाले थिति बसालेर राम्रा काम गर्न सक्नुपर्नेमा जोड दिए ।

‘समाजमा ठुलो परिवर्तन आएको छ । राजनीतिक परिवर्तन र अरू स्वतन्त्रताका हकको मात्र होइन । हामी हरेक हिसाबले अधिकार सम्पन्न हुन चाहन्छौँ’, प्रधानमन्त्रीले भने, ‘सामाजिक प्रबन्धहरू यसरी गइरहेको छ अझै पनि डिजिटलको कुरा गरिरहेका छौँ तर त्यसैबैला उल्लेखनीय प्रतिशत मानवजाति  निरपेक्ष गरिबीको रेखामुखी छ ।’

प्रधानमन्त्री ओलीले सामाजिक सञ्जाल प्रयोगकर्ताको अधिकार एक सेन्टिमिटर पनि तलमाथि नहुने गरी सामाजिक सञ्जालको नियमन गर्ने तयारीमा सरकार रहेको बताए । तर उनले असामाजिक कुरा रोक्नै पर्ने प्रधानमन्त्रीको भनाइ छ । ‘यस्तो कुरा रोक्नुपर्छ भन्दा डिबेट गर्ने नै होइन, त्यो विरोधका लागि विरोध मात्र हो’, प्रधानमन्त्रीको भनाई छ।