बेरुजू घटाउन आन्तरिक नियन्त्रण प्रणालीलाई मजबुत बनाउन आवश्यक : मन्त्री यादव

काठमाडौं। खानेपानी मन्त्री प्रदीप यादवले बेरुजू आउन नदिनेगरी आन्तरिक नियन्त्रण प्रणालीलाई मजबुत बनाउन आवश्यक रहेको बताएका छन् ।

बुधबार पोखराको लेकसाइडमा आयोजित शासन तथा वित्तीय अनुशासनसम्बन्धी कार्यशाला गोष्ठीको उद्‌घाटन गर्दै मन्त्री यादवले वित्तीय अनुशासन कायम गर्न आन्तरिक नियन्त्रण प्रणालीलाई मजबुत बनाउनुपर्ने बताए ।

गण्डकी, बागमती र लुम्बिनी प्रदेशका खानेपानी हेर्ने कार्यालयसहितको कार्यशालामा उनले भने, 'बेरुजू आउन नदिन हामी सबै मिलेर काम गर्नु पर्छ । त्यसका लागि आन्तरिक नियन्त्रण प्रणालीलाई मजबुत बनाउन आवश्यक छ ।

यसैगरी उनले उत्पन्न बेरुजूलाई यथासीघ्र फर्स्यौट गर्नुपर्नेमा  जोड दिए  । 'असुल उपर गर्नु पर्ने बेरुजूलाई कठोर ढङ्गले लाग्न जरुरी छ । अब बेरुजू नै नआउन दिनेगरी काम गर्नुपर्छ,' उनले भने ।

सरकारको १६ औं योजनाले लिएको लक्ष पूरा गर्नलाई संघ र प्रदेशको उत्तिकै भूमिका रहेकाले खानेपानीका आयोजना छनोट गर्दा दोहोरोपन नहुनेगरी छनोट गर्नसमेत मन्त्री यादवले आग्रह गरे । 

'संघ र प्रदेशबाट आयोजना कार्यान्वयन गर्दा विद्यालयहरू र स्वास्थ्य संस्थाहरू लगायतमा अनिवार्य रूपमा खानेपानीको पहुँच पुर्‍याउनु पर्नेछ । आयोजना छनोट गर्दा दोहोरोपना हुनुहुँदैन ।'