राजीनामा दिने संघीय कर्मचारीलाई ट्रम्पले आठ महिनाको तलब दिने

वासिङ्टन डिसी । अमेरिकी राष्ट्रपति डोनाल्ड ट्रम्पले कार्यालयमा फर्किन नचाहने लगभग सबै कर्मचारीलाई ‘बाइआउट’ प्योकज दिने घोषणा गरेका छन् ।

अमेरिकी सरकारको आकारलाई खुम्च्याउन यो कदम चालिएको हो । ‘डिफर्ड रेजिग्नेशन प्रोग्राम’को हिस्सा बन्ने हो कि होइन भन्ने निर्णय गर्न ६ फेब्रुअरीसम्मको समय भएको मङ्गलवार लाखौँ कर्मचारीलाई पठाइएको इमेलमा ट्रम्पले बताएका छन् ।

सो मितिसम्ममा जागिर छाड्न चाहने कर्मचारीले जागिर छाडेबापत ८ महिनाको तल एकमुष्ठ पाउने बताइएको छ । अहिले अमेरिकी संघीय सरकारमा करिब २० लाख कर्मचारी छन् ।

यीमध्ये १० प्रतिशत अर्थात् करिब २ लाख जनाले यो कार्यक्रममा सहभागी हुने आशा ट्रम्प प्रशासनको छ । यो योजनाबाट सरकारको १ खर्ब डलरसम्म बच्न सक्ने ट्रम्प प्रशासनका एक वरिष्ठ अधिकारीले अमेरिकी सञ्चार माध्यमलाई भनेका छन् ।

हुलाक कर्मचारी, सेनाका जवान, अध्यागमनका अधिकारी र राष्ट्रिय सुरक्षाका केही कामदारले भने यो अफर नपाउने बताइएको छ ।