शिक्षा मन्त्रालयले विदेशी विश्वविद्यालयबाट सम्बन्धनप्राप्त कलेजहरूको अनुगमन गर्ने

काठमाडौँ । शिक्षा, विज्ञान तथा प्रविधि मन्त्रालयले विदेशी विश्वविद्यालयबाट सम्बन्धन प्राप्त कलेजहरूको अनुगमन गर्ने भएको छ । ती कलेजहरूको नियमन तथा व्यवस्थापनका लागि निर्देशिका बनाइरहेको मन्त्रालयले यही महिनाभित्रमा अनुगमन समेत थाल्ने जनाएको हो ।

शिक्षामन्त्री विद्या भट्टराईले त्यस्ता कलेजहरूको यही महिनाभित्रमा अनुगमन थालिने बताइन । हाल विदेशी विश्वविद्यालयबाट सम्बन्धन लिएर ५९ वटा कलेजहरू सञ्चालनमा छन् । ती मध्ये १४ वटा कलेजले मात्रै तोकेको मापदण्ड पुरा गरेको मन्त्रालयले गठन गरेको कार्यदलको प्रतिवेदनले औँल्याएको थियो ।

मापदण्ड पुरा नगरेका कलेजहरूलाई मापदण्ड पुरा गर्नका लागि निश्चित समय दिन समेत कार्यदलले सुझाव दिएको थियो । कार्यदलले दिएको सुझावका आधारमा निर्देशिका बनाउने काम भइरहेको र माघको पहिलो हप्ताभित्रमा निर्देशिका बन्ने मन्त्री भट्टराईले बताइन् ।

निर्देशिका अन्तिम चरणमा पुगेको बताउँदै मन्त्री भट्टराईले मागको पहिला हप्तामा निर्देशिका आउने र त्यसले नियमन गर्न सजिलो हुने बताइन् । तत्कालीन शिक्षामन्त्री सुमना श्रेष्ठले ती कलेजहरूबारे अध्ययन गर्न कार्यदल बनाएकी थिइन । पूर्व सचिव शंकर कोइरालाको संयोजकत्वमा समिति गठन गरिएको थियो । उक्त समितिले विभिन्न खालका सुझावहरू दिएको थियो ।

त्यसपछि वर्तमान शिक्षामन्त्री भट्टराईले प्रतिवेदनमा केही अस्पष्टता देखिएको भन्दै त्रिभुवन विश्वविद्यालयका विज्ञान संकायका डीन प्राडा विनिल अर्यालको संयोजकत्वमा विज्ञ कार्यदल गठन गरेकी थिइन । उक्त कार्यदलले समेत आवश्यक ऐन कानुन बनाएर नियमन गर्नुपर्ने सुझाव पेस गरेको थियो ।

सोही आधारमा मन्त्रालयले निर्देशिका बनाउन लागेको हो ।हाल ‘विदेशी शिक्षण संस्थाको सम्बन्धमा उच्च शिक्षा सञ्चालन गर्ने सम्बन्धी निर्देशिका, २०५९’ को भरमा सञ्चालनमा छन् ।