प्रचण्डले बोलाए पदाधिकारी बैठक, क्रान्तिकारीको सम्मेलन स्थगित हुनसक्ने

काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले पदाधिकारी बैठक बोलाएका छन् । बिहीबार बिहान ८ बजे प्रचण्ड निवास खुमलटारमा बैठक बस्ने सचिव देवेन्द्र पौडेलले जानकारी दिए ।

पौडेलका अनुसार स्थानीय तह उपनिर्वाचन, प्रधानमन्त्री केपी ओलीको चीन भ्रमण, केन्द्रीय समिति बैठकको तयारी लगायत विषयमा छलफल हुनेछ । विभिन्न पदका लागि ४१ स्थानमा भएको स्थानीय तह उपनिर्वाचनमा माओवादीले उत्साहपूर्णमत ल्याएको थियो ।

पालिकाको एक अध्यक्ष, एक उपप्रमुख पदसहित ११ स्थानमा जितेर दोस्रो दल बनेको थियो । प्रधानमन्त्री ओलीको चीन भ्रमणको क्रममा बीआरआइलाई लिएर विभिन्न आशङ्का पैदा भएको थियो ।

यस्तै अखिल क्रान्तिकारीको २३ औँ राष्ट्रिय सम्मेलनबारे बैठकले निर्णय गर्ने स्रोतले बताएको छ । असोज १०–१५ सम्म त्रिभुवन विश्वविद्यालय कीर्तिपुरमा सञ्चालन भएको सम्मेलन उमेर हदको विवादका कारण स्थगित गरी मङ्सिर २३ र २४ मा सम्मेलन गर्ने निर्णय  गरेको थियो । तर  विद्यार्थीको नेतृत्व छनोटको विषयलाई  पदाधिकारी तहमै प्रतिष्ठाको विषय बनेपछि सम्मेलन हुने नहुने अनिश्चित भएको छ । स्रोतका अनुसार पदाधिकारी बैठकले सम्मेलन स्थगित गर्न सक्ने बताएको छ ।