फिल्म ‘कल्ली’बाट अभिनयमा कमब्याक गर्दै उत्तम

काठमाडौँ । अभिनेता उत्तम प्रधानले फिल्ममा कमब्याक गर्ने भएका छन् । उनी लामो समयपछि ‘कल्ली’ मार्फत फिल्ममा कमब्याक गर्न लागेका हुन् । निर्माण युनिटले फिल्ममा प्रधान अनुबन्धित भएको सार्वजनिक गरेको छ । 

फिल्मका निर्माता किरण नेपाली र लेखक तथा निर्देशक लक्ष्मण सुनारले सिक्किम पुगेर प्रधानलाई फिल्ममा अनुबन्धित गरेका हुन् । प्रधानले लामो समयपछि नेपाली फिल्ममा कमब्याक गर्न पाउँदा आफू उत्साहित भएको प्रतिक्रिया दिए । फिल्ममा उत्तमको भूमिका के हुने भन्ने निर्माण पक्षले केही खुलाएको छैन । उनले केही समयअघि अभिनेत्री निरुता सिंहसँग एक म्युजिक भिडियो अभिनय गरेका थिए । 

तुलसी घिमिरे निर्देशित ‘दर्पणछाया’बाट नेपाली फिल्ममा पाइला चालेका उत्तम पछिल्लो पटक ‘दर्पणछाया २’ मा विशेष भूमिकामा देखिएका थिए । त्यसपछि भने उनी नेपाली फिल्ममा सक्रिय छैनन् । 

‘कल्ली’ रेड बर्ड प्रोडक्शन र कस्तुरी प्रोडक्शनको ब्यानरमा निर्माण हुने फिल्म हो । फिल्ममा सौगात मल्ल, अर्पण थापा, बुद्धि तामाङ, कमलमणि नेपाल र बेनिशा हमालको समेत अभिनय रहनेछ ।