संघीयतासहितको गणतन्त्रको विकल्प छैन: ऊर्जामन्त्री खड्का

काठमाडौं। ऊर्जा, जलस्रोत तथा सिँचाइमन्त्री दीपक खड्काले संघीयतासहितको गणतन्त्रको विकल्पमा अरु कुनै शासन व्यवस्था नरहेको बताएका छन् । बिहीबार संखुवासभको चैनपुर नगरपालिका–११ लोहाकोटमा निर्मित वडा कार्यालय भवनको उद्घाटन गर्दै उनले संघीयताले देशको सुन्दर पक्ष उजागर गरेको बताए । 

उनले संसद्का दुई ठूला राजनीतिक दल मिलेर वर्तमान सरकार बनेकाले यो सरकारलाई अल्मलिएर बस्ने छुट नभएको स्पष्ट पारे । मुलुकको राजनीतिक स्थायित्वका लागि सरकार गठन भएको उनको भनाइ छ । 

‘मुलुकमा राजनीतिक परिवर्तन ल्यायौं, अब आर्थिक परिवर्तन गरेर समृद्ध नेपाल निर्माणमा अगाडि बढ्नुछ’, उनले भने । मन्त्री खड्काले संखुवासभा अथाह सम्भावना बोकेको जिल्ला भएकाले यहाँका स्रोत साधनको उचित प्रयोग गरेर समृद्ध जिल्ला निर्माणमा लाग्नुपर्ने बताए । 

उनले जनताको जलविद्युत कार्यक्रममार्फत् गरिबीको रेखामुनिका जनतालाई स्रोतमाथिको अधिकार सुनिश्चित गर्न प्रत्येक घरधुरीलाई आयोजनाको क्षमता हेरेर २ लाखदेखि पाँच लाखसम्म बिनाधितो जलविद्युतको सेयरका लागि सहुलियत दरमा ऋणको व्यवस्था गरिने बताए ।