म्यानचेस्टर युनाइटेड ३-० ले पराजित

एजेन्सी । इङ्लिस प्रिमियरसिपको आइतबार राति भएको खेलमा मयानचेस्टर युनाइटेडलाई टोटनहामले ३-० गोल अन्तरले पराजित गरेको छ।

भ्रमणकारी टोलीले शानदार प्रदर्शन गर्दै ओल्ड ट्रायफोर्डमा भएको खेलमा १० खेलाडीमा सीमित म्यानचेस्टर युनाइटेडलाई ३-० गोलले पराजित गरेको हो। यो हारले प्रशिक्षक एरिक टेन हागमाथि दबाब समेत परेको छ।

खेलको तेस्रो मिनेटमा ब्रेना जोन्सनको गोलबाट टोटनहामको दबदबा सुरु भएको थियो। मिक्की भान डी भेनले बनाएको मुभमा जोन्सनले गोल गरेका थिए।

४२ औं मिनेटमा ब्रनो फर्नान्डेजले रातो कार्ड पाएपछि म्यानचेस्टर युनाइटेडलाई थप धक्का लागेको थियो। दोस्रो हाफको दोस्रो मिनेटमा नै डेजान भुलिभ्सेस्कीको गोलमा टोटनहामले अग्रतालाई दोब्बर पारेको थियो। नियमित समय सकिन १२ मिनेट बाँकी रहँदा डेभिड सोलान्कोले अर्को गोल थपे।

इङ्लिस प्रिमियर सिपकै अर्को खेलमा इप्सविच र एस्टनभिल्लाको खेलमा २-२ गोलको बराबरी भएको छ। इप्सविचको घरेलु भूमिमा भएको खेलमा लियाम डेलापले दुवै गोल गरेका थिए।

भिल्लाका लागि रोजर्स र वाटकिन्सले गोल गरे। आइतबारको खेलपछि टोटनहाम ८ औं स्थानमा छ भने म्यानचेस्टर युनाइटेड १२ औँ स्थानमा छ।

यसैगरी इप्सविच १५ औं स्थानमा छ। अस्टन भिल्ला भने तालिकामा अग्रता कायम गर्ने अवसरबाट चुकेको छ। १३ अङ्क भएको भिल्ला पाँचौँ स्थानमा छ। १५ अङ्कसहित लिभरपुल शीर्ष स्थानमा छ।