कोठामा बसेर निर्देशन नदिन बालेनलाई उपमेयर सुनिता डंगोलको चेतावनी

काठमाडौं। काठमाडौं महानगरपालिकाकी उपप्रमुख सुनिता डंगोलले कोठामा बसेर निर्देशन नदिन प्रमुख बालेन साहलाई चेतावनी दिएकी छन् । प्रमुख प्रशासकीय अधिकृतलाई हाजिर गर्न नदिन बालेनले नगर प्रहरी परिचालन गरेपछि हरेक घटनाक्रबारे आफू जानकार रहेको भन्दै कोठामा बसेर निर्देशन नदिन मेयर साहलाई उनले चेतावनी दिएकी हुन्।

‘मन्त्रालयबाट पठाएपछि प्रमुख प्रशासकीय अधिकृत हाजिर गर्न आउनुभएको छ,’ उनले भनिन्, ‘उहाँ हाजिर गर्न आउँदा यो झडपको अवस्था हुनु राम्रो कुरा होइन । कर्मचारी–कर्मचारीबिच लडाईँ हुनु पनि राम्रो होइन ।’

महानगरवासीको हित चाहने सबै एकजुट हुनुपर्ने उनले बताइन् ।  ‘यो तमासा हामीले हेर्नुपर्ने ? मेयरको आदेश हो भने मेयर अघि आउनुपर्छ । होइन भने कोठामा बसेर आदेश दिन पाइँदैन । पहिला आजको विषय समाधान गर्छौं । त्यसपछि बोर्ड बैठक बस्छौँ । आजका लागि यो समस्या समाधान गर्नुपर्छ ।’

नगर प्रहरीको अवरोधबीच अहिले मेयर साहबिनै बैठक बसिरहेको छ । अनौपचारिक बैठकमा उपप्रमुख डंगोलले मेयर साहको चर्को आलोचना गरिन् ।

प्रमुख प्रशासकीय अधिकृत सरोज गुरागाईँ साढे तीन महिनापछि कार्यालयमा हाजिर भएका छन् ।

गुरागाईंलाई कार्यालयमा हाजिर हुने वातावरण बनाई दिन भन्दै संघीय मामिला तथा सामान्य प्रशासन मन्त्रालयले पत्र पठाएको एक महिनापछि अवरोधबीच हाजिर भएका हुन् ।

उनलाई कार्यालय पठाउन उपप्रमुख सुनिता डंगोल, अधिकांश कार्यपालिका सदस्य, वडाध्यक्ष र कर्मचारीले साथ दिएका थिए । 

मेयर बालेन साहले गुरागाईंलाई अवरोध गर्न नगरप्रहरी परिचालन गरे पनि अवरोध छिचोल्दै उनी कार्यालय प्रवेश गरेका हुन् । कार्यालय प्रवेश  गरेपछि पनि ताला फोड्न लगाइएको थियो । मेयर बालेन भने कार्यालयमा छैनन् ।

संस्थाभित्र मनमुटाव हुन नहुने भन्दै प्रमुख प्रशासकीय अधिकृत दोषी प्रमाणित भए कारवाही गर्न तयार रहेको उनले बताइन् । ‘त्यसैले उहाँलाई हाजिर गर्ने व्यवस्था गर्नुपर्छ। हजारौँ कर्मचारी र लाखौँ काठमाडौंवासीले दुःख पाएका छन् । क्यान्सर पीडितलाई पनि हामीले पैसा दिन सकेका छैनौँ ।

अझै छानबिन गर्नुपर्ने भए गर्ने हो । तर, यो पीडामा राख्नु हुँदैन ।’ काठमाडौं महानगरका प्रवक्ता नविन मानन्धरलगायत सबै वडाध्यक्षले पनि मेयर साहको चर्को आलोचना गरेका थिए । नगरप्रहरी प्रमुख राजु पाण्डेलाई उपप्रमुख डंगोलले ताला किन लगाएको भनेर प्रश्न गर्दा उनले गोलमटोल जवाफ दिएका थिए ।