म्यान्मारमा भूकम्पमा परी मृत्यु हुनेको सङ्ख्या तीन हजारभन्दा बढी पुग्यो

काठमाडौं। म्यानमारमा गएको शक्तिशाली भूकम्पमा परी मृत्यु हुनेको सङ्ख्या तीन हजार नाघेको छ । गत साता ७.७ म्याग्निच्यूडको भूकम्पका कारण मृत्यु हुनेको सङ्ख्या तीन हजार ८५ पुगेको जुन्ता सरकारले जनाएको छ ।

३४१ जना अझै बेपत्ता रहेको र चार हजार ७१५ जना घाइते भएको सरकारका प्रवक्ताले जारी गरेको विज्ञप्तिमा उल्लेख छ । भूकम्पका कारण भएको क्षतिमा राहत तथा उद्धारका लागि १७ देशबाट करिब एक हजार टन राहत तथा अन्य सामग्रीसहित सयौँको सङ्ख्यामा उद्धार तथा सहायताकर्मी आइपुगेको जाउ मिन तुनले बताए ।

'हामीले खोजी र उद्धारकार्यलाई निरन्तरता दिइरहेका छौं, साथै, हामी अन्तर्राष्ट्रिय समुदाय र मेडिकल टोलीको कडा परिश्रमप्रति विशेष कृतज्ञता व्यक्त गर्न चाहन्छौं,' उनले भनेका छन् ।