प्रेस सेन्टरका पदाधिकारीले भेटे स्वर्गीय पत्रकार सुरेश रजकको परिवार

काठमाडौँ । प्रेस सेन्टर नेपालको नवनिर्वाचित पदाधिकारीहरूको टिमले स्वर्गीय पत्रकार सुरेश रजकका परिवारको ३ बुँदे मागमा ऐक्यबद्धता जनाएको छ ।

सेन्टरका नवनिर्वाचित अध्यक्ष कमल गिरीको नेतृत्वमा बिहीबार बिहान स्वर्गीय पत्रकार रजकको निवास डल्लुमा पुगेर मृतकप्रति श्रद्धाञ्जली र परिवारजनमा समवेदना व्यक्त गर्दै परिवारको मागमा ऐक्यबद्धता जनाएको हो ।

भेटका क्रममा स्वर्गीय पत्रकार रजकका परिवारले राजावादी आन्दोलनमा मारिएको घटनाको निष्पक्ष छानबिन, दोषीमाथि कारबाही र सहिद घोषणा गर्नुपर्ने माग रहेकोमा तीनवटै माग सेन्टरका माग पनि भएकाले ऐक्यबद्धता जनाएको सेन्टरका महासचिव मनोज घर्तिमगरले जानकारी दिए ।

उनले सेन्टरको भर्खरै सम्पन्न पाँचौँ महाधिवेशनबाट जारी भएको काठमाडौँ घोषणापत्रमा समेत स्वर्गीय पत्रकार रजकलाई सहिद घोषणा गर्नुपर्ने बुँदा राखिएको छ ।

स्वर्गीय पत्रकार रजकको निवासमा सेन्टरका अध्यक्ष गिरीसँगै उपाध्यक्ष रामसिंह ठगुन्ना, दीपक श्रेष्ठ, निवर्तमान महासचिव सन्तोष पौडेल, उपमहासचिव बुद्ध लोप्चन, ज्ञानप्रसाद पौडेल, सचिव सुरेन्द्र चालिसे, नवराज दाहाल, केन्द्रीय सदस्य, अन्जु तामाङसहित काठमाडौँ उपत्यकाका ३ जिल्लाका प्रदेश तथा जिल्लाका पदाधिकारी समेत सहभागी थिए । स्वर्गीय रजकको परिवारलाई सेन्टरको टोलीले १० हजार आर्थिक सहयोग पनि उपलब्ध गराएको छ ।

यही चैत १५ मा राजधानी काठमाडौँको तीनकुनेमा राजावादीको आन्दोलनको रिपोर्टिङ गर्दै गर्दा आन्दोलनकारीले घरमा लगाएको आगोमा जलेर एभिन्यूज टेलिभिजनमा कार्यरत पत्रकार रजकको निधन भएको थियो ।

सङ्गठनले उक्त घटनाको घोर भर्त्सना गर्दै घटनाको वास्तविकता बाहिर ल्याउन र दोषीमाथि कडा कारबाहीका लागि सरकारको ध्यानाकर्षण गराएको छ । साथै पीडितलाई उचित क्षतिपूर्ति उपलब्ध नगराए कडा आन्दोलन गर्ने प्रतिबद्धता समेत सेन्टरले जनाएको छ ।