रास्वपाको प्रदर्शनपछि सहकारी पीडित पनि सडकमा, रविलाई पक्राउ गर्न माग

पोखरा । राष्ट्रिय स्वतन्त्र पार्टी रास्वपाका सभापति रवि लामिछानेको पक्षमा रास्वपाका नेता कार्यकर्ताले प्रदर्शन गर्न थालेपछि पोखरामा सूर्यदर्शन सहकारीका पीडितहरूले पनि सडक प्रदर्शन गरेका छन् । रास्वपाले जिल्ला प्रशासन कार्यालय अगाडि शहिदचोकमा प्रदर्शन गरिरहेका छन् । सोही ठाउँमा सहकारी पीडितहरू पनि नाराबाजीसहित उपस्थित छन् ।

पीडितहरूले आफ्नो पीडामा सहयोग गर्नुको सट्टा पीडित विरोधी प्रदर्शन गरेको आरोप लगाएका छन् । ‘कुनै रवि वा अमुक व्यक्तिको कुरा भएन । यो त पार्टीको जस्तो भयो,’ सङ्घर्ष समितिका संयोजक किरण श्रेष्ठले भने, ‘हामीले न्याय मागेको हो ।उहाँहरू न्यायको विरुद्ध प्रदर्शनमा उत्रिनुभयो ।

हामी पनि बचाउका लागि सडकमा झर्न बाध्य भयौँ ।’उनीहरुले रवि लामिछानेलाई पक्राउ गर्नुपर्ने माग राखेका छन् ।  रविले गोर्खा मिडियामार्फत सहकारीको रकम अपचलन गरेको आरोप पीडितहरूको छ । पीडितहरूले प्रशासन कार्यालयको गेट अगाडी प्रदर्शन गरेका हुन् ।

पीडितले रवि पक्राउको माग गर्दा रविका समर्थकहरूले चाहिँ कुनै हालतमा पक्राउ गर्न नहुने चेतावनी दिएका छन् । रास्वपा गण्डकीका सभापति राजन गौतम चाहिँ आफूहरू पीडितकै पक्षमा भएको बताउँछन् ।

कार्यकर्तालाई सम्बोधन गर्दै उनले भने, ‘हामी फासिस्ट सरकारका विरुद्ध मैदान ओर्लिएका डौँ । सहकारी पीडितलाई दुःख दिन आएका होइनौँ । उहाँहरूको न्यायका लागि नै जुटेका हौँ ।’

पीडितहरूले सहिद चोकमा न्याय माग्दै प्रदर्शन गरिरहेका छन् । उनीहरुले यसअघि रवि लामिछाने पोखरा आएको कार्यक्रममा समेत प्रदर्शन गरेका थिए भने कालो झन्डा देखाएर विरोध जनाएका थिए ।