एमाले सांसदले मागे उपसभामुख रानाको राजीनामा, रास्वपाको प्रतिवाद

काठमाडौं। प्रतिनिधिसभाका उपसभामुख इन्दिरा रानाविरुद्ध ‘पदीय आचरणअनुसार काम नगरेको’सम्बन्धी प्रस्ताव ल्याउनेबारे सत्ता गठबन्धनमा छलफल चलिरहेको बेला नेकपा (एमाले)का सांसदले उनको राजीनामा माग गरेका छन् ।

मंगलवार बसेको प्रतिनिधिसभा बैठकको शून्य समयमा एमालेले सूर्यप्रसाद ढकालले नैतिकताको आधारमा राजीनामा दिन माग गरेका हुन् । ‘सदनभित्र र बाहिर पनि नैतिकताको कुरा उठेको छ, पदीय मर्यादा र मानव तस्करीको कुरा उठेको छ,’ ढकालले भने, ‘सदन र सदन बाहिर कुरा उठेपछि उपसभामुखले मार्ग प्रशस्त गर्न अर्थात् राजीनामा दिनको लागि आग्रह गर्छु ।

एमालेकै शोभा ज्ञवालीले उपसभामुखमाथि मानव तस्करीको आरोप लाग्नु गम्भीर विषय भएको भन्दै संसदको ध्यानाकर्षण गराइन् ।

नेकपा (माओवादी केन्द्र)का सूर्यमान दोङ र हितराज तामाङ तथा राष्ट्रिय स्वतन्त्र पार्टी (रास्वपा)का सोविता गौतम र सुमना श्रेष्ठले उपसभामुखलाई हटाउने काम नगर्न सत्ता गठबन्धनलाई चुनौती दिए । उपसभामुखको लेटरप्याड दुरुपयोग गरेर केही व्यक्तिलाई अमेरिकाको भिसा सहजीकरण गरेको प्रकरणमा उनीमाथि प्रश्न उठेको थियो ।