संघीय धर्मनिरपेक्ष गणतन्त्रको अवधारणामा पुनर्विचार गरौँ : कमल थापा

काठमाडौँ । राप्रपा नेपालका अध्यक्ष कमल थापाले संविधानमा संशोधन गर्ने हो भने संघीय धर्मनिरपेक्ष गणतन्त्रको अवधारणामा पुनर्विचार गर्नुपर्ने बताएका छन् ।

पार्टीको काठमाडौँ–२ को क्षेत्रीय प्रशिक्षण कार्यक्रममा बोल्दै थापाले दुई दलीय व्यवस्था कायम गर्नुपर्छ भन्नेहरू प्रजातन्त्र विरोधी र निरंकुशताका पक्षधर भएको समेत उनले आरोप लगाए ।

समानुपातिक र समावेशी मान्यता कमजोर बनाउनु संविधानको भावना विपरीत भएको भन्दै थापाले सम्भावित सर्वसत्तावादको विरुद्ध आम नागरिक सचेत हुनुपर्ने समय आएको समेत टिप्पणी गरे ।

देश बचाउन र बनाउन राष्ट्रवादी शक्ति बलियो हुनुपर्ने भन्दै उनले पार्टीलाई स्थापित र निर्णायक शक्ति बनाउन कस्सिएर लाग्नुपर्नेमा जोड दिए ।

प्रशिक्षणमा डाक्टर विष्णु भण्डारी, वरिष्ठ अधिवक्ता विष्णु भट्टराई, राजाराम बर्तौला, बिश्नुगोपाल श्रेष्ठ, उज्वल पोखरेल लगायतले बोलेका थिए ।