कर्णाली योजना आयोगले पायो पूर्णता

सुर्खेत । कर्णाली प्रदेश योजना आयोगले चार महिनापछि पदाधिकारी पाएको छ । तत्कालीन मुख्यमन्त्री राजकुमार शर्माले राजीनामा दिएपछि आयोग रिक्त रहेको थियो ।मुख्यमन्त्री यामलाल कँडेलले रिक्त रहेको आयोगलाई पूर्णता दिएका हुन् । कँडेलले आयोगको उपाध्यक्षमा आफ्नै वडा निवासी सूर्यनाथ योगीलाई नियुक्त गरेका छन् । 

यस्तै सदस्यमा मुगुको छायाँनाथ रारा नगरपालिका–५, का डम्बर रावल र कालिकोटको रास्कोट नगरपालिका–३ का अशोकनाथ योगी नियुक्त भएका छन् । उपाध्यक्ष नियुक्त भएका योगी र रावल एमालेको कोटाबाट नियुक्त भएका हुन् भने सदस्य योगी नेपाली कांग्रेसको कोटाबाट नियुक्त भएका हुन् ।

उनीहरुले बिहीबार पद तथा गोपनीयताको शपथ लिएका छन् । मुख्यमन्त्री यामलाल कँडेलले उनीहरूलाई शपथ खुवाएका हुन् । उपाध्यक्षमा नियुक्त भएका योगी दैलेखको गमौडीमा जन्मिएका हुन् । हाल वीरेन्द्रनगर नगरपालिका–४, निवासी योगी कृषि विज्ञ हुन् ।

उनी योगी नरहरिनाथ अध्ययन तथा अनुसन्धान प्रतिष्ठानका क्याम्पस प्रमुख समेत हुन् । उनी भारत, थाइल्यान्ड लगायतका विभिन्न देशहरूमा गएर त्यहाँको विकासबारे अध्ययन अनुसन्धान समेत गरेका छन् ।