प्रधानमन्त्रीले विश्वासको मत लिने विषय सदनलाई जानकारी

काठमाडौं। सभामुख देवराज घिमिरेले प्रधानमन्त्री पुष्पकमल दाहाल 'प्रचण्ड'ले  यही असार २८ गते शुक्रबार विश्वासको मत लिने जानकारी संसद्लाई गराएका छन् ।

सरकारमा रहेको सबैभन्दा ठूलो दल एमालेले समर्थन फिर्ता लिएपछि अल्पमतमा रहेका प्रधानमन्त्री प्रचण्डले शुक्रबार संसद् सचिवालयलाई पत्रमार्फत विश्वासको मत लिने जानकारी गराएका थिए ।

प्रधानमन्त्री कार्यालयको पत्रपछि आइतबारको बैठकमा सभामुख घिमिरेले प्रधानमन्त्रीले विश्वासको मत लिन लागेको जानकारी प्रतिनिधि सभालाई गराएका हुन् ।यस अघि प्रधानमन्त्रीले ४ पटकसम्म विश्वासको मत लि‍इसकेका छन् ।

२०७९ मा प्रधानमन्त्री भएपछि पहिलोपटक पुस २६ गते, चैत ६, २०८०  फागुन ३० गते र गत जेठ ७ गते प्रधानमन्त्रीले विश्वासको मत लिएका थिए । यी चारपटक प्रधानमन्त्रीले बहुमत पाएका थिए ।

तर यसपटक प्रमुख सत्ता सहयोग एमालेले नै समर्थन फिर्ता लिएपछि प्रधानमन्त्रीलाई विश्वासको मत पाउन कठिन देखिएको छ ।कांग्रेस र एमाले मिलेर नयाँ समीकरण बनाउने समझदारी गत असार १७ गते गरेका थिए ।