करेन्ट लागेर तीन जनाको मृत्यु

काठमाडौं। करेन्ट लागेर इलाम, सिरहा र धादिङमा तीन जनाको मृत्यु भएको छ । मंगलबार दिउँसो करेन्ट लागेर इलामको फाकफोकथुम गाउँपालिका-६ मेतालुङ पोखरी बस्ने ६६ वर्षीय कुलबहादुर विकको मृत्यु भएको हो ।  

घरबाट गाउँतर्फ जाँदै गरेको अवस्थामा बाटोमा लत्रिएको विद्युतको तारबाट करेन्ट लागेर उनको मृत्यु भएको प्रहरीले जनाएको छ ।यस्तै, मंगलबार बेलुकी सिराहाको लहान नगरपालिका-२२ बेल्ही बस्ने २५ वर्षीया गीता चौधरीको पनि करेन्ट लागेर मृत्यु भएको  छ ।

आफ्नै घरको आँगनमा मोटर जडान गरेको कल चलाउने क्रममा करेन्ट लागेर गम्भीर घाइते भएकी उनको प्रादेशिक अस्पताल लहानमा उपचारको क्रममा मृत्यु भएको प्रहरीले जनाएको छ ।

यसैगरी मंगलबार बेलुकी धादिङको धुनिवेशी नगरपालिका-५ फुरौलेस्थित टिनको छाप्रोमा विद्युत जोड्ने क्रममा करेन्ट लागेर उदयपुर घर भएका ३५ वर्षीय दिलिप राउतको मृत्यु भएको छ ।यसबारे थप अनुसन्धान भइरहेको प्रहरीले जनाएको छ ।