महाधिवेशनबाट यस्तो बन्दै छ जसपा नेपालको कार्यसमिति

काठमाडौँ । जनता समाजवादी पार्टी नेपाल महाधिवेशनको तयारीमा जुटेको छ । महाधिवेशनको प्रतिनिधि चयन गर्ने काम धमाधम भइरहेको छ । जेठ १० गतेभित्र एक हजार महाधिवेशन प्रतिनिधि चयन गरिसक्नु पर्ने कार्यकारिणी समितिले निर्णय गरिसकेको छ ।

महाधिवेशनबाट १५१ सदस्यीय कार्यकारिणी समिति चयन हुनेछ । जसमा अध्यक्ष १, सहअध्यक्ष १, उपाध्यक्ष ३, महासचिव १, उपमहासचिव ३, सचिव ७ र कोषाध्यक्ष १ गरी १७ पदाधिकारीसहित १५१ सदस्यीय केन्द्रीय समिति निर्वाचित हुने पार्टीका प्रचार प्रसार विभाग प्रमुख पूर्ण बस्नेतले बताए ।

यद्यपि जेठ १ गते सम्पन्न केन्द्रीय समितिको बैठकले केन्द्रीय समिति सदस्यको सङ्ख्या बढाउने निर्णय गरेको छ । त्यसका लागि विधान संशोधन गर्नुपर्छ । विधान संशोधनको प्रस्ताव महाधिवेशनमा लगिनेछ । केन्द्रीय समितिमा कति सदस्य थप्ने निर्णय त्यहाँबाट हुने उनले बताए ।

जसपा नेपालले महाधिवेशनबाट आदिवासी जनजाती, मधेसी, खस क्षेत्री र ब्राह्मण, थारु, दलित, मुस्लिम, अपाङ्गता भएका र अल्पसङ्ख्यक गरी सात वटा सामाजिक समूहहरूबाट केन्द्रीय समितिमा समावेश गरिनेछ ।हरेक समूहबाट ३३ प्रतिशत महिला र ४० प्रतिशत युवा निर्वाचित हुने चयन हुने बताइएको छ ।  

यसरी निर्वाचन गर्दा आदिवासी जनजाति समूहबाट ३० जना, मधेसी समूहबाट १६ जना, खस क्षेत्री र ब्राह्मण समूहबाट ३३ जना, थारुबाट ६ जना, दलितबाट १४ जना, मुस्लिमबाट ४ जना अपाङ्गता भएका र अल्पसङ्ख्यक समूहबाट ३ जना निर्वाचित गरिने हुने जसपा नेपालले जनाएको छ ।यसरी सामाजिक समूहबाट ३५ जना महिला र ४२ जना युवा निर्वाचित हुने छन् ।

जसपा नेपालले सामाजिक समूहबाट १०६ र खुल्ला प्रतिस्पर्धाबाट ४५ गरी १५१ सदस्यीय केन्द्रीय समिति निर्वाचित गर्ने हुने प्रावधान राखिएको छ । जसपाको महाधिवेशन आगामी जेठ २८ गतेदेखि जनकपुरमा हुने भएको छ ।