चलचित्र ‘चङ्गा चेट’को अर्काे गीत ‘ढल्की ढल्की...’ सार्वजनिक

काठमाडौं  ।  दिपेन्द्र के खनालको निर्देशन रहेको यो बर्षको प्रतिक्षित चलचित्र ‘चङ्गा चेट’को गीत ‘गोजीमा दाम छैन’ले सांगीतिक आकाश तताइरहेको बेला निर्माण युनिटले फेरि अर्काे गीत ‘ढल्की ढल्की...’ सार्वजनिक गरेको छ ।

गीतमा विवाह बन्धनमा बाँधिने तयारी गरेका रियल प्रेमी जोडी अभिनेत्री प्रियंका कार्की र अभिनेता आयुष्मान जोशी देखिएका छन् । गीतमा आयुष्मानले प्रियंकालाई गर्लफ्रेण्डका रुपमा मात्र नभएर पर्मानेन्ट श्रीमती बनाउने चर्चा गरेको सुन्न सकिन्छ । गीतमा सन्दिप क्षेत्री, रबिन्द्र झा, सुरक्षा पन्त र परमिता आरएल राणा पनि देखिएका छन् ।

अल्मोडा राना उप्रेतीको स्वर, हरिहर तिमल्सिनाको शब्द तथा मिस्टर आरजेको संगीत रहेको गीतलाई प्रविन सिंहले कोरियोग्राफी मार्फत सिंगार्ने काम गरेका छन् ।

माधव वाग्ले र शर्मिला पाण्डेले सयूंक्त रुपमा निर्माण गरेको यो चलचित्रको कथा प्रदीप भारद्वाजले लेखेका हुन् । यसमा निश्चल बस्नेत, बेनिशा हमाल र ऋचा शर्माको विशेष भूमिका रहेको निर्माण युनिटले बताएको छ ।

चलचित्रमा अर्जुन पोखरेलको संगीत, निरक कँडेलको छायाँकन र दीर्घ खड्काको सम्पादन रहेको छ । डार्क कमेडी बिषय चलचित्रले देखाउने निर्देशक दिपेन्द्रले बताए ।