शीर्ष नेताबीच कुराकानीपछि संसदीय समितिमा टीआरसीबारे छलफल शुरू

काठमाडौं। प्रधानमन्त्री पुष्पकमल दाहाल 'प्रचण्ड'ले प्रमुख प्रतिपक्षी दल नेकपा एमालेलगायत संसद्‌का प्रमुख दलका नेतासँग छलफल गरेपछि विवाद टुंग्याउन संसदीय समितिको बैठक शुरू भएको छ ।

कानून न्याय तथा मानव अधिकार समितिमा आइतवार बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन २०७१ लाई संशोधन गर्न बनेको विधेयकमाथि छलफलको कार्यसूची छ ।

बिहान साढे ११ बजेका लागि बोलाइएको बैठक दलहरूबीचको छलफलका कारण झण्डै २ घण्टा ढिलो गरी शुरू भएको छ । बैठकमा कानून मन्त्री धनराज गुरुङ उपस्थित छन् ।संक्रमणकालीन न्यायसम्बन्धी विधेयकमा सहमतिको प्रयास स्वरूप प्रधानमन्त्री प्रचण्डले बिहान एमाले अध्यक्ष केपी शर्मा ओली, कांग्रेस सभापति शेरबहादुर देउवा र रास्वपा सभापति रवि लामिछानेसँग भेटवार्ता गरेका थिए ।

एमालेले विधेयक पीडित मैत्री हुनुपर्ने र गम्भीर मानव अधिकार उल्लंघनमा संलग्नलाई माफी दिन नमिल्ने अडान राख्दै आएको छ ।यो विधेयक संसद्‌को चालू हिउँदे अधिवेशनबाट पारित गराउने सरकारको तयारी छ ।