लुम्बिनी प्रदेशसभाका विषयगत समितिका सभापतिको निर्वाचन स्थगित

बुटवल। लुम्बिनी प्रदेशसभाका विषयगत समितिका सभापतिको निर्वाचन स्थगित भएको छ । प्रदेशसभा सचिवालयले आइतवार सूचना जारी गरी १७ पुसमा तोकिएको समितिका सभापतिको निर्वाचन स्थगित भएको जनाएको हो ।

विशेष कारण देखाउँदै सभामुख तुलारामको घर्तीको निर्देशनअनुसार अर्को सूचना जारी नभएसम्मका लागि निर्वाचन स्थगित भएको प्रदेशसभा सचिवालयका सचिव दुर्लभकुमार पुनले जानकारी दिए । प्रदेशसभा निर्वाचन भएको एक वर्षभन्दा बढी भइसके पनि लुम्बिनी प्रदेशका संसदीय समिति अझै नेतृत्वविहीन छन् ।

लुम्बिनी प्रदेशसभाका सदस्यहरूले अघिल्लो वर्ष १७ पुसमा शपथ लिएपछि प्रदेशसभाको पहिलो अधिवेशन गत १८ पुसदेखि शुरू भएको थियो । माघ ३ मा सभामुख र उपसभामुख चयन भएका थिए ।

तर, सरकारको कामकाजको खबरदारी र कानून निर्माण गर्न महत्त्वपूर्ण भूमिका निर्वाह गर्ने संसदीय समितिले अझैसम्म नेतृत्व पाउन सकेका छैनन् ।सत्तारुढ गठबन्धनभित्र समितिको नेतृत्वको विषयमा भागबण्डा नमिल्दा नेतृत्वका लागि निर्वाचन हुन सकेको छैन ।

लुम्बिनीमा अर्थ, उद्योग तथा पर्यटन समिति, प्रदेश मामिला तथा कानून, सार्वजनिक लेखा, भौतिक पूर्वाधार तथा विकास, सामाजिक विकास र कृषि वन तथा वातावरण समिति छन् । 

६ समितिमा लेखासहित २ वटा समितिको सभापति एमालेलाई दिने र बाँकी सत्ता गठबन्धनले लिने तयारी छ । यद्यपि सत्तारुढ गठबन्धनभित्र कसले कुन समितिको नेतृत्व लिने भन्ने टुंगो भने लागेको छैन ।