फिल्म ‘हल्कारा’को काठमाडौंमा प्रिमियर

काठमाडौँ । शुक्रबारदेखि सार्वजनिक प्रदर्शनमा आउने फिल्म ‘हल्कारा’ को बुधबार साँझ प्रिमियर गरिएको छ । वान सिनेमाज मल्टिप्लेक्समा गरिएको प्रिमियरका नेतादेखि कलाकारसम्मको बाक्लो उपस्थिति रहेको थियो ।

सांसदहरू रघुजी पन्त, ज्ञानेन्द्र शाही र एमाले नेता प्रदीप ज्ञवाली, अभिनेता राजन खतिवडा, मुकुन भुसाल लगायत प्रिमियरमा सहभागी थिए । प्रिमियरमा सहभागी अधिकांशले फिल्म मन परेकाे प्रतिक्रिया दिए ।

फिल्मका निर्देशक विक्रम सापकोटा, अभिनेता महेश त्रिपाठी, अभिनेत्री विनिता थापामगर प्रिमियरमा सबैको आकर्षणको केन्द्र बनेका थिए । विभिन्न अन्तर्राष्ट्रिय अवार्डमा पुरस्कार समेत जित्न सफल फिल्म एक हुलाकीको कथामा निर्माण भएको हो । 

विक्रम सापकोटाको लेखन तथा निर्देशन रहेको फिल्मलाई रामकृष्ण पोखरेलले निर्माण गरेका हुन् । पोखरेलले निर्माण गरेको ‘ऐना झ्यालको पुतली’ गत वर्ष ओस्कार अवार्डमा सिफारिस भएको थियो ।