सुरक्षा पन्त अभिनित ‘बुलाकी’ को टिजर सार्वजनिक

काठमाडौं । अभिनेत्री सुरक्षा पन्त अभिनित ‘बुलाकी’ को टिजर सार्वजनिक भएको छ । आगामी बैशाख १ गते अर्थात नयाँ वर्षबाट प्रदर्शनमा आउन लागेको यस चलचित्रको शुक्रबार म्यूजिक डटकम च्यानलबाट टिजर सार्वजनिक गरिएको हो

सार्वजनिक २ मिनेट १ सेकेन्डको लामो टिजरमा कर्णालीको ग्रामीण जीवन, रितिथिति, परम्परा र जारी प्रथाको विषयलाई प्रस्तुत गरिएको छ । टिजरमा अभिनेत्री सुरक्षा पन्त कर्णाली भेषभुषा, लवजमा र अभिनयमा उत्कृट देखिएकी छन् ।

चलचित्रमा सुरक्षाका अलावा नरेन खड्का, विराज बिष्ट, रमेश बुढाथोकी, लक्ष्मी गिरी, कुलदीप अधिकारी, सुशील पोखरेल, झलनाथ खत्री, धनबहादर राई, लक्ष्मण देवकोटा, प्रकाश कँडेल, सरस्वती खत्री आदिको अभिनय रहेको छ ।

लक्ष्मण सुनारद्वारा निर्देशित चलचित्रको निर्माण टोपेन्द्र विष्टले गरेका हुन । अर्जुन जिसीले सम्पादन गरेको उक्त चलचित्रको स्क्रिप्ट निर्देशक सुनार, अभिनेता विष्ट, राजबहादुर साने र निर्मल पौडेलले तयार गरेका हुन् ।

चलचित्रको छायांकन भने डोल्पा, जाजरकोट र रुकुम पश्चिमका विकट स्थानमा गरिएको छ ।